الفنانة ناهد رشدى لـ"قصواء الخلالى": "حبيت التمثيل من أفلام الأبيض وأسود"

الفنانة ناهد رشدى

كتب أحمد عرفة

الخميس، 19 مايو 2022 08:54 م

قالت الفنانة ناهد رشدي، إنها لم تكن تحب الدراسة، ولكن كانت تفضل الشعر واللغة العربية والتمثيل والمسرح، مضيفة: "كنت ألعب ماندولين وأشارك في طابور الصباح، حتى أنهيت الدراسة فى المرحلة الثانوية، وكنت أمام أحد الخيارين، كلية التجارة والمعهد، فالتحقت بالمعهد العالي للفنون المسرحية".

وأضافت رشدي في حوارها مع الإعلامية الإعلامية قصواء الخلالي، مقدمة برنامج "في المساء مع قصواء"، على قناة سي بي سي: "حبيت التمثيل من أفلام زمان لأنها كانت بتقول حاجة، حتى الكوميديا كانت رسالة، لأن كل إنسان عنده همومه ومشاكله وبالتالي كنا نحصل البسمة دون إسفاف".

وتابعت: "أفلام زمان كانت بتقول حاجات كتير، بس بطريقة حلوة، زي الفلوس مش كل حاجة، وراحة البال أهم، والمنصب مبيسعدش والسلطة مبتسعدش، وبالتالي طلعت فاهمة كويس إن راحة البال هي كل حاجة".

وأردفت: "تعلمت الرضا من أفلام الأبيض والأسود، أحب التمثيل، وممكن مشتغلش 10 سنوات، كل فترة بقعد سنين طويلة مش بشتغل، لكن بحب أتفرج والمسلسلات الناجحة مثل رمضان كريم وأبو العروسة وجزيرة غمام، بنحس إن الأسرة حلوة، وبقول إيه الجمال ده، ومش كل حاجة ضرب".

وقالت الفنانة ناهد رشدي، إنها من عشاق مسلسل الكبير أوي، لأنها تقدم كوميديا "لذيذة"، موضحةً: "محتاجين نضحك، كفاية الضغوط على الشعب".

وأضافت رشدي، أن هناك فارق بين الفنان والممثل: "الفنان حاجة تانية خالص، زي محمود المليجي، بنخاف منه لأنه شرير وبنصدقه إنه شرير، رغم إنه إنسان طيب جدا في الحياة".

وتابعت: "اللي بنصدقه في كل دور هو الفنان، لكن في ممثل قدير بس مش فنان، عشان كده بتضايق إن ممثل أو ممثلة طلعوا مشهد أو مشهدين أو مشاهد كتير يكتبوا عنهم فنانين، ليه؟! اكتبوا الممثل أو الممثل القدير، اكتبوا كل حاجة إلا فنان، لأن الفنان حاجة تانية مثل أحمد زكي".

ووصف الفنان أحمد أمين بأنه فنان، لأنه صادق: "صدقته في الكوميديا وصدقته في جزيرة غمام، عندنا فنانين كتير كويسين جدا، لكن لازم الجمهور يصدق الفنان في كل دور".

كما تحدثت عن الغناء، وقالت إن هناك فارق بين الطرب والغناء، موضحةً: "بهاء سلطان صوت وإحساس، وبالتالي ده مثال واضح على الفارق بين المطرب والمؤدي".

وأشارت، إلى أنها لا تنسى عملين فنيين شاركت فيهما وهما مسلسل "سفر الأحلام" لوحيد حامد وسمير سيف، ومسلسل الحب وأشياء أخرى لإنعام محمد علي: "لا أنسى دور فردوس وإكرام، المخرج كان يستناني لحد ما أبدأ احس بالشخصية، لكن دلوقتي مفيش وقت للكلام ده".

وقالت الفنانة ناهد رشدي، إنها أحبت مسلسل أحلام سعيدة، للنجمة يسرا، والذي عُرض في شهر رمضان الماضي، موضحةً: "حسيت إن الممثلين بيحبوا بعض، كانوا كتلة حب، مش مجرد إنهم رايحين يمثلوا، عماد رشاد عمل مشهد صغير وكان جميل وبكيت بسببه رغم إن المسلسل لايت".

وأضافت رشدي، أنها توقفت عن التمثيل لفترة بسبب أبنائها: "مهما السيدة كانت دكتورة أو مهندسة أو ناجحة في شغلها، الاولاد في سن المراهقة بيبقوا محتاجين للأب والأم، السن ده لازم نعديه، وبين الولد الأول والتاني 5 سنين، وهناك ظروف صحية أبعدتني عن الفن أيضا".

وتابعت الفنانة: "مش بعمل حاجة مش حباها، بس بعدت في الفترة اللي فاتت بسبب خوفي من كورونا وقلت أريح شوية رغم إني اتطلبت في أكتر من حاجة".

وأشارت، إلى أنها والفنانة حنان سليمان مقربتان بسبب تشابه طباعهما: "مقولة عدوك ابن كارك غلط، لنا مواقف جميلة مع بعض، صعب إن أي ممثلة تعملها مع ممثلة، وبنكلم بعض على شغل بعض"، لافتةً إلى أن الفنانة عزة لبيب من الفنانات مالقربات لها.