أبطال "ريفو" يكشفون تفاصيل المسلسل بعد عرضه على منصة "WATCH IT"

قال الفنان محسن محيى الدين: من الجميل أن نعمل أعمالا جديدة، وكاتب مسلسل ريفو يحاول كتابة أشكال جديدة للدراما، وأن المنصات مثل "WATCH IT" تقوم بدور هائل جدا لأنها بتدور على أفكار جديدة غير الموجودة على التليفزيون.

وأضاف خلال مداخلة ببرنامج الحياة اليوم مع الإعلامية لبنى عسل على قناة الحياة: الناس بتحب المنصات علشان ما فيش إعلانات بتقرفها ويقدروا يشاهدوا الحلقة كاملة، والموجود حاليا على كل المنصات 10 حلقات وليها تكملة طبعا ولكن الحلقات الـ10 تعتبر موسما للعمل.

وتابع: عندما كنت صغيرا كنت ببقى سعيد جدا إنى اشتغل مع النجوم الكبار زى فريد شوقى كنت بحس إنهم بيشجعونى ويساعدونى ولابد أن يستمر ذلك جيل يسلم جيل.

وقال الفنان مينا النجار، عندما أمسكت أوراق مسلسل ريفو ما قدرتش أبطل قراءة وحسيت انى الشخصيات فيها حد شبهى أو حاجات مريت بيها وانا استمتعت من اول الورق وكانت فيها متعة.

وأضاف خلال مداخلة ببرنامج الحياة اليوم مع الإعلامية لبنى عسل على قناة الحياة: التمثيل بيفتحلنا أبواب علشان نجرب حاجات جديدة عننا وعن اشخاص ما نعرفهاش وده بيدينا متعة حقيقية وكل مرة الواحد بيشتغل حاجة جديدة، والتفاصيل الإنسانية بتخلى الواحد يكتشف أن مش كل الشخصيات شبه بعض.

وقال الفنان حسام حسنى عندما عرض عليا الدور فى مسلسل ريفو وانا مش من ابطال العمل لكن انا الشخصية الحقيقية فى المسلسل وعجبنى الموضوع جدا واعتبرته تأريخ ليا وحسيته بيتكلم عنى أنا شخصيا.

وأضاف: كنت مبسوط جدا بالدور وزى جمهور التسعينيات كانوا شايفين عبد الحليم حافظ ومبهورين بيه وحابيين انهم يعيشوا فيها برضه جيل الألفينيات بيحسوا بكده، وبيعتبروا الفترة دى فترة ذهبية زى ما انا كنت بحلم انى اشوف عبد الحليم حافظ وكنت أتمنى اسلم عليه.