إبراهيم عمل من الصاج تمثال ضخم لـ تنين طوله 14مترًا.. وحلمه الوصول العالمية

قد يعتقد البعض إن "الخردة "، مكانها القمامة، لكن هذا الاعتقاد لن يؤمن به الفنان إبراهيم صلاح، الذى يعمل على تصميم تماثيل بارتفاعات مختلفة من الصاج والإطارات القديمة، وأحدث أعماله تمثال كبير لـ" تنين ضخم"  

إبراهيم عمل من الصاج القديم تمثال كبير لتنين فى وقت قياسى
 

 قال إبراهيم الحاصل على دبلوم فنى قسم سيارات في حديثه لـ "اليوم السابع ":" أنا بحب النحت وفكرت استخدم الخردة في تصميم التماثيل عشان أكون مختلف عن غيرى، واتحديت نفسى وبفضل ربنا وتشجيع الناس كسبت التحدي وبعد تصميم أول تمثال ليا حصلت على دعم كبير جدًا من جمهور السوشيال ميديا وبدأ يحصل تواصل بيني وبين صاحب فندق سياحي شهير متابع لأعمالي وطلب منى أنفذ له تمثال من الخردة فصممت أول تمثال لـ غوريلا من إطارات السيارات المستعملة وكان ارتفاعه 5 أمتار ومكون من 200 قطعة ووزنه وصل لطن وأنجزته في 27 يوما والتماثيل اللى زي دى بتاخد وقت من شهرين لثلاثة شهور في تصميمها ولأنى بحب شغلى قدرت أصمم التمثال فى وقت قياسى".

وتابع:" اختارت يكون تمثال التنين من الصاج  ووزنه 300 كيلو وطوله 14 مترا و أخد مني وقت عمل فترة  كبيرة لأن التنين كان اختيار العميل مش اختياري كنت قلقان من النتيجة لكن في النهاية الناس انبسطت جداً".

 وعن اختياره للصاج في تصميم التمثال، قال:" اخترت الصاج  لتجربة نحت نوع جديد وصعب و بدأت اجمع الصاج المستعمل من الورش وأخدت ثلاث أيام في التجميع  وبدأت أنفذ التمثال والخامة كانت صعبة جداً ولكن  نجحت في تصميم التمثال في فترة تتراوح من 24 لـ 26 يوما وكانت النتيجة مفأجاة ليا أنا شخصيًا إني انتهي من التمثال في وقت قليل".

 يعمل إبراهيم على تطوير نفسه في فن النحت، حيث قال :" بطور من نفسي طول الوقت ونفذت تماثيل كبيرة في أكتر من مدينة زى إسكندرية ودهب وجبل الطويلات ومدينة 6 أكتوبر وبسعي أنشر أعمالي في كل مكان في مصر وبفكر مختلف وأوصل للعالمية".

تننين من الصاج

إبراهيم مع التمثال

صورة أخرى للتنين