مدحت تيخة: خسيت 17 كيلو بسبب نور الشريف.. ومش بحب المحشى والبشاميل.. فيديو

حل الفنان مدحت تيخة، ضيفا على تليفزيون اليوم السابع، وحاوره الكاتب الصحفى على الكشوطى، وتحدث عن اسمه الحقيقى وخسارته للوزن بسبب دوره فى مسلسل "خلف الله" للنجم الراحل نور الشريف.

وقال مدحت تيخة: "أول حاجة ليا مسلسل حضرت المتهم أبى واسمى على التتر اتكتب مدحت إسماعيل، وأنا صحابى بينادوا عليا مدحت تيخة من قبل ما أمثل ولما محمد السبكى كنت بعمل معاه أول فيلم ليا "آخر كلام" شاف كل الناس بتنادى عليا تيخة قالى حلو خليك مدحت تيخة، والاسم جه عشان أنا تخين، وكان الأساتذة في المعهد يقولى ليا أن كلمة تيخة هتحجمك في الكوميدى بس، وبعد كده فكرت فيها وقولت لو خسيت في يوم من الأيام مش هبقى تيخة خالص".

وبسؤاله هل من الممكن أن يفقد الوزن بسبب شخصية يجسدها، رد قائلا "حصل معايا قبل كده في مسلسل خلف الله مع النجم نور الشريف الله يرحمه وخسيت 17 كيلو في شهر وخدت جائزة على الدور، وبعد الدور رجعت تانى كنت مشتاق للأكل وحبيت شكلى وعندى استعداد أموت نفسى عشان الشخصية و أخس وأنا شخصيا مش بحب الأكل ولا بحب المحشى و لا المكرونة بشاميل و لا حلويات الناس بتبقى فهمه الناس الممتلئة بتحب الأكل بالعكس ممكن تكون جينات".

وشارك الفنان مدحت تيخة، في فيلم "بحبك"، الذى يعرض الآن في موسم الصيف، ويشهد أولى تجارب تامر حسنى الإخراجية فى السينما، وهو من تأليفه وبطولته، والفيلم من بطولة، هنا الزاهد وحمدى الميرغنى ومدحت تيخة وهدى المفتى وعمرو صحصاح وتميم عبده وسمر محمد متولى، وتدور الأحداث حول حياة رجل يخوض قصتي حب، ويتخبط في حياته بين فتاتين، ويُظهر اختلاف مدى صدق التعبير عن الحب بين الرجل والمرأة.