والدة البطلة بسنت حميدة لتليفزيون اليوم السابع: بنتى حارمة نفسها من كل شيء عشان الرياضة.. وترد على منتقدى ملابسها: دعوا الخلق للخالق لأن ربنا أعلم بالنوايا.. وتؤكد: "تعليقاتكم كانت قاسية عليها".. فيديو

عبرت الدكتورة ريم إسماعيل، والدة بسنت حميدة لاعبة منتخب ألعاب القوى، قائلة: "بنتى حرمت نفسها مش من كل شيء عشان الرياضة وقادرة أوصف فرحتى بيها، أنا بطلة أفريقيا فى الجمباز وكلنا عائلة رياضية".

وأضافت فى مداخلة خاصة لتليفزيون اليوم السابع: "كنا بنقول ألف حمد وشكر ليك يا رب".

وقالت: "بنتى حارمة نفسها من الخروج والفسح والسهر وكل شيء عشان الرياضة، وكمان متفوقة دراسيا، وكلنا عائلة متميزين فى الرياضة عندى ولادى التلاتة أبطال رياضيين وبسنت صبرت كتير وربنا كرمني".

فى سياق متصل قالت: "بسنت كانت بتقول ربنا ليه حكمة إنى أتصاب عشان أروح البطولة وقد كان وحقق الإنجازات دي"، وتحدثت عن تمرينها قائلة: "بسنت فى الثانوية العامة كانت بتدرب عكس كل البنات، وجيبنا ليها جيم فى البيت وتفوقت رياضيا ودراسيًا".

وأضافت: "بسنت قبل دورة طوكيو اتصابت وأنا عيطت عليها وبسنت جالها حالة نفسية وتعبت جدًا وجوزها قالها لا تقدرى وكان بيعانى معاها لأنه مدربها الشخصى كمان، جوز بنتى كان بيقيس الـ100 متر بـ"المتر" فى الشارع أيام كورونا عشان بسنت تدرب وقت ما كانت النوادى مقفولة والناس كانت بتستغرب من اللى بيعمله".

وحول زى بسنت وتعليقات السوشيال ميديا عليه قالت: "مينفعش تلعب غير باللبس دا بالذات فى المسافات القصيرة بس والله هى مش بتلبس قصير ولا بتنزل البحر بالمايوه ولا بتتمرن بيه وبتلعب بلبسها دا فى البطولات وبس".

فى السياق ذاته قالت: "أقول للناس اللى بتقول بسنت سجدت بالمايوه إن بنتى فكرت فى إنها تقول لربنا شكرا وتسجد له والتعليقات عليها كانت قاسية وبقولهم دعوا الخلق للخالق لأن ربنا أعلم بالنوايا".

وأنهت: "بسنت كانت محجبة وجالها مرض فى شعرها خلاها مش بتروح التمرين بسببه ادعولها ربنا يوفقها".

واستطاعت بسنت حميدة التغلب على الصعاب، فبعدما تعرضت للإصابة قبل مشاركتها فى منافسات دورة الألعاب الأولمبية التى أقيمت بطوكيو 2020، حيث تعرضت بسنت حميدة للإصابة بمزق فى العضلة الخلفية، وتم عرضها على اللجنة الطبية، وخضعت لأشعة مقطعية أثبتت إصابتها لتغيب عن البطولة التى طالما انتظرتها طويلا.

لم تستسلم بسنت للإصابة بل بعد تأهيليها وشفائها بدأت المشاركة تدريجيًا فى البطولات التالية، مثل بطولة العالم، وبطولة التشيك الدولية، وفى يونيو الماضى تعرضت للإصابة مجددا بمزق فى العضلة الضامة، وهو ما جعلها تنسحب من البطولة الأفريقية.

بسنت حميدة فتاة مصرية نشأت فى أسرة رياضية، والدتها أستاذة جامعية وبطلة جمباز، وشقيقها باسم حميدة بطل 400 م، كما تعمل معيدة فى الجامعة بعد دراسة استمرت 4 سنوات، حصلت خلالها على تقدير امتياز مع مرتبة الشرف، لتثبت أن الرياضة لا يمكن أن تكون عائقًا أمام نجاح أى شخص، وعدم إهدار الوقت أو السهر، والتركيز بشكل كامل على تقسيم ساعات اليوم للاستفادة منها بأكبر قدر ممكن.