محمد كريم: شعور رائع إنى أجيب أبطال فيلم هوليوودى إلى بلدى

محمد كريم

رامى محيى الدين

الأربعاء، 10 أغسطس 2022 08:57 م

قال الفنان محمد كريم: "شعور رائع إنى أعمل عرض خاص لفيلم هوليوودى في بلدى، وأفتخر إنى أجييب أبطال الفيلم هنا في مصر، وشرف ليا إنى أكون اتولدت في مصر واتعلمت في مصر، وإنى أعمل الصعب وأدخل عالم هوليوود".

وأضاف كريم، خلال لقائه برنامج الحياة اليوم مع الإعلامى مصطفى شردى المذاع على قناة الحياة: "في ناس كتيرة جدا كانت بتقولى ده مستحيل، وجاللى أوقات كثيرة كنت بحس إن ده صعب فعلا لأنى سافرت كثير ورجعت من غير ما أحقق حاجة، الجميع عنده حلم واحد هو هوليوود، ولو فكرت إنى هروح فين في وسط العالم دى عمرى ما كنت هوصل لكن أنا بحب الصعب جدا".

وتابع: "في ناس ما تعرفش إن ده شغل 15 سنة، أنا بسافر وأرجع وأسيب شغل هنا وأسافر هناك، والناس فاكرة إنى ده شغل 4 سنين فقط، وأنا كنت عارف من الأول إن الموضوع هياخد سنين، لازم الواحد يكون مسلم إنه هيبدأ من الصفر وإن مفيش حد يعرفه تماما، أول مرة أدخل أعمل تجارب الأداء لقيت في 150 محمد كريم نفس الطول نفس الشكل لون الشعر وما نجحتش، وأنا عديت 2000 تجربة أداء، ووصلت لمرحلة إن سيارتى تحولت لدولاب ملابس علشان أبقى جاهز لأى تجربة أداء".

وأكمل: "كنا بنحتفل بأى ممثل من زملائنا يحصل على دور وقعدت 15 سنة أتعزم بس مش بعزم حد، وفى فيلم نيكولاس كيدج ماكنتش أعرف مين البطل وده فيلم العودة ليه، ماكنتش حابب أطلع في دور عربى شرير، وفضلت إنى أستنى وأعمل الصعب".

وأكد أن ما يهم صناع العمل في هوليوود هو التمكن والموهبة علشان كدة ممكن تلاقى واحد أول مرة يمثل ياخد بطولة مش لازم يجيبوا نجم، ولو مش بفكر في بلدى ما كنتش جبت أبطال العمل معايا من لوس أنجلوس لحد هنا، ولو كل واحد منا في إيده حاجة يقدر يعملها يعملها من نفسه من غير ما حد يطلب منه كان وضعنا هيتغير، وأنا ما حدش طلب منى إنى أجيب الممثلين لمصر، وأنا تحملت جزء كبير من تكاليف الزيارة، ولكن في رجال أعمال محترمة كثيرة جدا وكلها مجهودات فردية بعيدة عن الرسميات، وده لأنى كل ما أسافر وأرجع ألاقى مدينة جديدة والطرق، وجبت منتجين من هوليوود وأخدتهم ورحنا العاصمة الإدارية.