طبيب شيرين: أقف بجانبها لأنها "أم كلثوم العصر".. ومهرجان قرطاج أعطاها قبلة الحياة ..فيديو

قال الدكتور نبيل عبد المقصود مدير قصر العينى الفرنساوى سابقا، والمتخصص فى علاج السموم، الطبيب الخاص بالنجمة شيرين عبد الوهاب الذى قبلت يده بمهرجان قرطاج بتونس: شيرين طلبت إنها تلغى حضور حفل قرطاج وكلمت مدير أعملها وقالتله يبلغ، فاتصلت بيها وسألتها ليه؟ ردت وقالتلى: مش قادرة أواجه الجمهور دلوقتي ولا أقف ساعة على المسرح ".

وأضاف عبد المقصود فى لقائه ببرنامج "أهلا بيك" المذاع على تليفزيون اليوم السابع: أنا قولت لشيرين لأ هتروحي وهتقدري وأنا هاجي معاكي، مضيفا: كانت حاسة إنها مش جاهزة ومش هتقدر تقف قدام الجمهور ودي وجهة نظرها وكانت وجهة نظر غلط، وأنا مكنتش قلقان خالص، وكنت متأكد إن التوفيق من عند ربنا، وإنها جاهزة ومحتاجة الدفعة الإيجابية ولغيت مواعيدي وروحت فعلاً معاها".

وتابع: "لما روحت معاها لقيتها أبدعت وتألقت وتفوقت على نفسها وعملت حفلة متعملتش في المهرجان كله وكان رد فعل الجمهور غير عادى وقعدت تغني ساعتين إلا خمس دقايق متواصلين"، مضيفا: "قالتلي: كان كلامك صح".

في سياق متصل قال: إن "شيرين عببدالوهاب استعادت نفسها مرة أخرى ومهرجان قرطاج أعطاها قبلة الحياة، ومش هتفضل واقفة في مكانها وهتتقدم إلى الأمام".

في السياق ذاته، قال: "أنا بعتبر شيرين عبدالوهاب أم كلثوم العصر، ربنا إداها حنجرة وصوت مش عند حد، وعلشان كده أنا بساعدها ولازم كلنا نساعدها، والوحيد اللي يقدر يساعدها في الوضع دا جمهورها اللي بيحبها لازم يساعدها ويشجعها".

برنامج أهلا بيك يقدمه تامر إسماعيل، ويذاع أسبوعيا على تليفزيون اليوم السابع، وأعد هذه الحلقة محمد محسوب.