التسوية تحت الأرض والبهارات سر الطبخة.. "أبو مردم" أشهر الأكلات الشعبية فى سيوة

أبو مردم أكللة شعبية فى سيوة

كتبت: منه الله حمدى نهير- عبد النبى ـــ تصوير: ماهر إسكندر

الإثنين، 12 سبتمبر 2022 12:00 ص

لكل بلد عادات وتقاليد خاصة بها سواء في الزواج أو المناسبات أو حتى الطعام، ومنها أكلة أبو مردم التي يشتهر بها أهالي واحة سيوة، والتي يتم طهيها بدفنها تحت الأرض.

تتميز أكلة أبو مردم بتسوية اللحوم تحت الأرض باستخدام الحطب والرمل والنار، كما تتميز هذه الأكلة بالبهارات الخاصة بأهالى سيوة وسر هذه الأكلة هو شجر الزيتون حيث يستخدم في التسوية، ويقال إن سبب تسمية أبو مردم بهذا الاسم هو ردم الرمال الساخنة على أوانى الطعام بهدف التسوية.

"لو جيت سيوة ومكلتش أبو مردم يبقى كأنك مجتش سيوة "هي الجملة التي يرددها أهالى سيوة دائما وقالها "على عليوة" من أشهر الطباخين في سيوة والمعروف بإبداعه في أكل المردم حيث قال "أنا شغال في أكلات أبو مردم من زمان فيه ناس بتقول عليها المندى وفيه ناس بتقول عليها المردم وأى حد بييجى سيوة لازم يدوق أكلتنا المشهورة أبو مردم سواء كانت فراخ أو لحمة أو بط".

وتابع: "احنا بنجيب حطب وبراميل وبنولع الحطب ساعة ونص وبعدين بنغسل الفراخ ونتبلها بملح وخل وليمون وخل ونسيبها لغاية ما تتصفى وبعدين بتتبل بالبصل والجزر والخضرة والكمون والكزبرة والفلفل الأسود لمدة ساعة ونصف أو 4 ساعات أقصى حاجة، بعد ما تتبل بننزل الفراخ فى البرميل ونغطيها وتستوى فى ساعة ونص والأرز بيستوى معاها في نفس الوقت وبتطلع مستوية وريحتها مميزة ".

وتابع"بعمل خضار تورلى بردو عبارة عن كوسة وجزر مع البهارات المختلفة، و في اللحمة اللى معمولة تحت الأرض بنستخدم زعتر ليبى وده بيدى للحمة طعم مختلفة تمام والناس كلها بتحبه، وزى ما الستات ليها نفس في الأكل أنا كمان نفسى حلو في الأكل واحلى من الستات كمان".

وانهى حديثه"الناس بتيجى من كل مكان عشان تدوق أكلة أبو مردم من سيوة، هي اه بتتعمل في أماكن كتير لكن في سيوة ليها طعم تانى والسر في شجر الزيتون وبهاراتنا الخاصة".