‎هشام عباس:جواز بنتي أحلى حاجة .. وعاوز أمثل مع داليا البحيري ونيللى كريم

أعرب الفنان هشام عباس عن سعادته البالغة بزواج ابنته "ياسمينا"، وقال خلال مداخلة هاتفية لبرنامج خلاص صحينا مع مارينا المصري على ميجا اف إم: "أحلى حاجة حصلت لي السنة اللي فاتت كانت جواز بنتى ياسمينا، كنت سعيد جدا ومتأثر أوى لدرجة إنى كنت بضحك وبعيط فى نفس الوقت".

‎وتابع: "فخور بمشاركتي في مهرجان أبيدوس اللى بتنظمه دار الأوبرا في سوهاج.. وكانت حفلة جميلة جدا قدام المعبد، وأخيرا مشاركتي في مهرجان المحكى بالقلعة من أسبوعين، وأنا بحب اعمل حفلات وأكون متواجد فى كل محافظات مصر عشان أسيب تأثير كويس فى كل الناس".

كما ذكر هشام عباس أنه يعمل خلال الفترة الحالية على انتهاء من ألبومه الجديد، قائلًا: "السنة دي إن شاء الله هخلص الألبوم بتاعى قبل 2022 ما تخلص، إن شاء الألبوم الجديد هيكون ميكس بين المقسوم بتاعنا والمقسوم الجديد اللى بيتعمل فى الأغاني الشعبي وأغاني المهرجانات بس بشكل جميل".

وأضاف: "الألبوم الجاي فيه أغنيتين واحدة اسمها "عن اقتناع" وأغنية اسمها "كلامها حلو، وبتعاون فى ألبومى الجديد مع عزيز الشافعى وأمير طعيمة وتوما ومدين وأيمن بهجت قمر، وطول عمري بحاول أعمل أشكال مزيكا مختلفة من أول ما بدأت، ومن سنة 2007 بحاول أشتغل حاجات جريئة زي اللى قدمتها مع عزيز الشافعى في أغنية "دي طريقة دي تتكلمي بيها معايا"، ومع أيمن بهجت قمر عملت أغنية "عينك فى عيني يا نور عيني".

واستكل حديثه قائلًا:" وكمان بشتغل على البرنامج الجديد اللى هقدمه، البرنامج الجديد مفاجأة واستكمال لبرنامج شريط كوكتيل، نفسي أمثل جدا بس فى نفس الوقت نفسي أقدم حاجة تعمل فرق، عشان كده بفكر فى المسرح لأن رد فعل الناس فيه بيكون مباشر، ونفسي أعمل مسرحية غنائية كوميدية، وأحب أمثل مع داليا البحيري لأن دمها خفيف، ومع نيللى كريم، وأيتن عامر، وشذى".