أمير صلاح الدين ينشر صورة لمحادثة "واتس آب" مع الراحل هشام سليم قبل وفاته

نشر نجم فريق "بلاك تيما" الموسيقي أمير صلاح الدين، صور لمحادثة سابقة بينه وبين الراحل هشام سليم يطمئن فيها على حالته الصحية قبل وفاته بعدة أشهر، وشارك نجم بلاك تيما، صور المحادثة مع الجمهور عبر حسابه الشخصي على موقع "إنستجرام"، وعلق عليها: "نسألكم الفاتحة".

تغريدة امير صلاح الدين على انستجرام

وعلى جانب آخر، يشار إلى أن الفنانة نشوى مصطفى، حرصت أن تروى موقفًا إنسانيًا للنجم الراحل هشام سليم مع الفنانة ثريا إبراهيم، إذ قالت إنه تكفل بمصاريف أدائها لفريضة الحج.

وكتبت نشوى مصطفى عبر حسابها بموقع فيس بوك: افتكرت حاجة عن هشام سليم يمكن مش كتير يعرفوها، فى يوم راجعة من التصوير وكان فيها أستاذة ممثلة كبيرة الله يرحمها اسمها ثريا إبراهيم، قالت لى نشوى معنديش عربية توصلينى فى طريقك لأقرب مكان انزل اخد تاكسى، قلت لها تاكسى ازاي حوصل حضرتك لباب البيت، واحنا ماشيين قالت لى عارفة الشقة اللي حتوصلينى ليها دى مين جابهالى — قلت لها مين ؟؟ قالت لى شيريهان، وحكت لى انها كانت بتشتغل معاها مسرحية شارع محمد على وكانت بتيجى كل يوم من طنطا للقاهرة وترجع تانى لان بيتها كان هناك ولما شريهان عرفت قالت لها شوفى الشقة اللي تحبيها وأنا حاشتريهالك، ولما اشترتها كانت فرحانة اوى.

الراحل هشام سليم

 وأضافت نشوى مصطفى: لما هشام عرف بارك لها وقال لها فرشتيها ولا لسه قالت له فرشتها قال لها كان نفسى افرشها لك قالت له وهى بتهزر طيب ما تعمل حاجة تانية قال لها تحت امرك، قالت له نفسى احج، تانى يوم لقت شركة سياحة بتكلمها وبلغتها ان هشام دفع كامل التكلفة وكانت خمسين الف جنيه وكمان وهى رايحة عطاها مصروف الرحلة وقال لها ادعى لى — بس كده — الف رحمة ونور.