سوسن بدر تكشف عن منزلها فى راس سدر وكيف تحل مشاكلها به

كشفت الفنانة الكبيرة سوسن بدر عن حلها حينما تشعر بأى توهة أو حيرة في حياتها بسبب أي موقف صعب تمر به قائلة : بروح بيتي في "راس سدر" عندي هناك من ييجي 18 سنة، وعملاه على زوقى في كل حاجة، وكمان على البحر مباشرة، وهناك بحب اقعد افكر براحتي من غير أي غشاوة".

واستكملت : "بروح هناك ومعايا الكلب بتاعي، خاصة انى بحب الحيوانات، وكان عندي قطط كبير، دلوقتى ما بقاش منهم غير قطة واحدة كبرت خالص".

وحلت الفنانة الكبيرة سوسن بدر، ضيفة فى الجزء الثانى من برنامج "واحد من الناس" للإعلامى عمرو الليثى، المذاع على قناة الحياة، وأجابت سوسن بدر على بعض الأسئلة السريعة وقال: "أحب أن أكون أنثى ولا أكون ذكرا، وأحب اسم "آمنة" وهو اسم والدتى فى مسرحية "ريا وسكنية " وأيضا لأن كل واحد له نصيب من اسمه وأنا أحب الشعور بالأمان".

وتابعت سوسن بدر: "أولادى حاولوا يعلمونى لعبة على الإنترنت اسمها ساكند لايف، بتختار فيها حياتك وأصدقائك وكل حاجة ففوجئوا إنى اخترت حياتى زى ما هى مرة أخرى، وأحب أعيش على جزيرة على البحر بدون تكنولوجيا وبدون ضوضاء زى أجواء العشرينات، وأكون متزوجة ومش بشتغل، مع انى معنديش اى موهبة تانية غير التمثيل، كان نفسى أكون مدرسة للأطفال فئة 3 سنوات".

وعن دور الراقصة فى فيلم "ديل السمكة" قالت سوسن بدر: "أخدت جائزة لجنة تحكيم خاصة وهو 4 مشاهد فقط وكلمنى الأستاذ وحيد حامد وبعتلى السيناريو وكلمته بعدها قولت له أنا مش هقدر أعمل الدور ده، وألح عليا وقال لى هتعمليه وخليكى ممثلة مطيعه وعملت الدور ونجح جداً".