خدمة وشوشة: "عايشة مع زوج عصبى وعنيف وأهلى بيقولوا لى لازم تستحملى وتعيشى"

"عندى مشكلة كبيرة، نفسى حد يساعدنى فيها، أنا متزوجة من 13 سنة، ومن أول شهر فى الزواج ومع أول مشكلة كان زوجى يضربنى لأتفه الأسباب، ولجأت لأهلى علشان يشوفوا لى حل، لكن كان ردهم إن كل البيوت كده، والستات كلها بتضرب وإنتى حامل وهتبقى أم، ولازم تستحملى وتعيشى، وكنت بغضب ويرجعونى ويجى ياخدنى، ويخلف وعده معايا، إن هو مش هيمد أيده عليا بعد كدا، ومن تانى اتكررت نفس المشكلة، وهى دى حياتى بقالى 13 سنة، وأنا معايا ثلاث أولاد، ونفسى أطلق لأنى بكرهه من قلبى، ومش عايزة أكمل حياتى معاه، وأهلى عايزينى أرجع، وأنا مش عايزه ومش قادرة أتحمل أكثر من كده، ومش عارفة أعمل إيه؟ وما فيش سكن ليا ولا لأولادى، ولا دخل مادى، حاسة إنى بموت ونفسى فى حل يخلصنى من اللى أنا فيه قولوا لى أعمل إيه ولو عايزين تعرفو سبب ضربه فيا إيه هو بيقول إنى عصبية وأنا بتعصب على الأولاد من ضغط الشغل عليا".

*****

نقلنا المشكلة للدكتورة إيمان عبد الله خبيرة العلاقات الأسرية والتى قالت إن الأمر بدأ بالتهاون منذ البداية مما جعل الزوج يتمادى فيما يفعله، خاصة مع أسرتها الذين يتعاملون معه بمنتهى السلبية، ومن الواضح أن صاحبة المشكلة لم تتعلم أو تركز على أسباب هذه المعاملة القاسية من الأساس، فهل هى من تستفزه بشكل مباشر أو إنه يتعاطى مخدرات أو يفتعل معها المشكلات.

وتابعت أن على صاحبة الشكوى التركيز خلال الفترة المقبلة بأن تعرف جيداً ماذا تريد، دون أن تدخل أحد من أهلها من أصحاب المواقف السلبية، وتلجأ لشخص عاقل من عائلة الزوج لحل المشكلة، خاصة مع وجود أولاد، لكن إذا وصلت لطريق مسدود فوراً تطلب الطلاق وبشكل قطعى لأن الحياة مع زوج عنيف يتحدث بيده وليس بلسانه أمر صعب تقبله.

خدمة وشوشة

فى إطار حرص "اليوم السابع" على التواصل المباشر مع القراء، وتقديم الخدمات المختلفة والمتنوعة، أطلقت "اليوم السابع" خدمة "وشوشة" لتلقى أى استفسارات أو مشاكل نفسية أو اجتماعية أو تربوية، على أن يتم عرض المشكلات على الخبراء والمختصين الموثوقين ونشر الردود عبر الموقع الإلكتروني والجريدة.

يمكنكم التواصل معنا من خلال رقم واتس اب 01284142493 أو البريد الإلكترونى Washwasha@youm7.com أو الرابط المباشر.