مكان كله بهجة.. اعرف حكاية أقدم مصبغة خيوط بالدرب الأحمر

مكان عمره 123 سنة وبالرغم من أن المكان قديم للغاية إلا انك بمجرد دخولك هتلاحظ مبنى كله بهجة من الألوان الموجودة داخله، إنها مصبغة العم سلامة أقدم مصبغة خيوط فى الدرب الأحمر.

حكاية عم سلامة بدأت مع الألوان عندما أتى مع والده سنة 1944 للقاهرة بحثاً عن العمل، لكنه فى الأصل هو من شبين القناطر محافظة القليوبية.

قال عم سلامة "اشتغلت فى الأول حاجات كتير زى قهوجى ومع كبابجى وغيره لكن ملقتش نفسى غير مع الألوان فى المصبغة فاشتغلت مع واحد اسمه "الحاج حنفى محمود الزعبلاوي"، وبعد كام سنة دخلت الجيش ولما خلصت الخدمة العسكرية قررت إنى أخد مكان خاص لى وهى المصبغة اللى احنا موجودين فيها دلوقتى ودا كان سنة 1974 لكن المصبغة نفسها عمرها 123 سنة. 

وحتى الآن ما زال "العم سلامة" هو وأولاده وأحفاده يعملون بالمصبغة فهو لديه 8 بنات و4 صبيان و40 حفيدا وجميعهم تعلموا المهنة منه وأحبوها حباً جماً.

واستكمل عم سلامة حديثه: الشغلانة دى من أيام الفراعنة والمصبغة هنا شغالة بالطريقة البلدى على قديمه يعنى وبالرغم من كدا عندى زباين من كل حتة من أول اسوان لحد اسكندرية، وكمان زباين من أمريكا وإيطاليا.

عم سلامة يبلغ حالياً ٨٦ عاماً وبالرغم من كبر سنه إلا أنه لا يستطيع الاستغناء عن المهنة وحبه لها، حيث يقطع يومياً عشرات الكيلومترات من منزله بالقليوبية إلى منطقة الدرب الأحمر لكى يباشر عمله ويساعد العمال بنفسه.