إسراء إسماعيل تكتب: ملحمة أكتوبر.. قصص وحكايات لا تنتهى.. روايات مصرية توثق ذكريات النصر

إسراء إسماعيل

الخميس، 05 أكتوبر 2023 08:25 م

حرب أكتوبر ليست مجرد حدث نحتفل به كل عام.. هذه الحرب أعادت لمصر هيبتها، ومجدها، وكرمتها، حرب أثبتت للعالم كله عظمة وقوة وشجاعة الجندي المصري، وأخد فرصته فانتصر.. لذلك تم توثيق هذه الأحداث لكي تعلم الأجيال القادمة ماذا حدث، ومثل ما ظهرت روايات وكتب مضللة، تنفي انتصارنا في أكتوبر، كان يجب أن تظهر روايات وكتب، تؤكد للعالم كله، حكاية الشعب اللي حارب، وانكتب له الانتصار.

من أهم الروايات مثلاً:

رواية الرفاعي، التي يحكي فيها الأستاذ جمال الغيطاني، عن العميد أركان حرب إبراهيم الرفاعي، قائد ومؤسس الفرقة 39 قتال، واللي قدر الكاتب يقرب من أفرادها، ويعيش معاهم، ويرصد بطولاتهم عن قرب، في فترة صعبة واستثنائية.

روايه الرفاعي

حكايات الغريب، زي ما كان الأستاذ جمال الغيطاني بيحكي لنا قصص ووقائع مفرحة ومشرفة عن الحرب، كان لازم كمان يسلط الضوء على مواقف محزنة ومؤلمة، زي الحكاية اللي حكاها في حكايات الغريب، واللي بتحكي عن جندي مصري اسمه عبد الرحمن، اختفى بعد نكسة 67، وفضل أهله يدوروا عليه، وكل ما يروحوا بلد، يلاقوا حد يأكد لهم إنه كان موجود في البلد دي، بس باسم مختلف.

روايه حكايات الغريب

وتعتبر حكايات الغريب مجموعة قصصية، ركزت على روح أكتوبر، خصوصًا فترة حصار السويس، اللي حطت المواطن المصري البسيط قدام تحدي كبير، كان سبب إنه يرفض يتخلى عن أرضه، ويدافع عنها بكل قوة، وتم تحويل الرواية إلى فيلم بنفس الاسم.

حكايات الغريب

ده طبعًا غير الروايات اللي رصدت بعض العمليات اللي قامت بيها المخابرات، قبل، وأثناء الحرب، زي عملية الحفار، اللي كتبها الأستاذ صالح مرسي، واللي بتحكي عن تدمير المخابرات المصرية للحفار كينتينج، اللي أجرته إسرائيل؛ للتنقيب عن البترول في الجزء المحتل من قناة السويس.

الخفار

وبتعرض الرواية أسلوب عمل القوات البحريه المصرية، وطريقة تفكيرهم وتحليلهم للموقف، وردود أفعالهم في المواقف الصعبة، واللحظات الإنسانية اللي بيمروا بيها، زي الاحتفال بعيد الأضحى مثلاً، وتم تحويل الرواية إلى مسلسل تليفزيوني.

ارتبط اسم دكتور نبيل دايمًا، بسلسلة رجل المستحيل، اللي بدأ كتابتها سنة 1984، وانتهى منها سنة 2009، لكن اللي ما يعرفوش ناس كتير، إن دكتور نبيل كتب في كل حاجة، وفي كل المجالات، ومن أهم مؤلفات عن حرب أكتوبر:

روايات الرجل المستحيل

العميل 1001، واللي بيحكي فيها عن البطل عمرو طلبة، اللي زرعته المخابرات المصرية في إسرائيل، تحت اسم موشي زكي رافع، ونجح في الالتحاق بالجيش الإسرائيلي، واستشهد بعد ما دمر وحدة الاتصال بين الكتيبة اللي كان فيها وبين القيادة في إسرائيل، وتم تحويل القصة لمسلسل بنفس الاسم.

العميل 1001

البعث، رواية البعث هي العدد الأول من سلسلة فاي، واللي بتحكي عن شاب من شباب الصاعقة، كان مكلف مع كتيبته بمهمة خلف خطوط العدو، لكن بسبب انكشاف وجود الكتيبة، بيتم القضاء عليها بالكامل، باستثناء الشاب ده، اللي قرر يقوم بالمهمة لوحده، وأبلغ القيادة المصرية بقراره، وكان نتيجة قراره، إنه تعرض لإصابات بالغة، كانت السبب في فقدانه الذاكرة، وانضمامه للمخابرات المصرية، تحت رمز فاي.

رواية البعث

عملية قصر، بتحكي الرواية عن أربعة من شباب الصاعقة، تم تكليفهم من قِبَل وزير الحربية، بمهمة تدمير محطة الإنذار المبكر عاين، وبترصد الرواية، الترابط الإنساني بين الشباب دول، وتناسي فارق الرتب، وكيفية تصرفهم في أصعب اللحظات، خصوصًا إنهم لوحدهم خلف خطوط العدو، وكمان بتورينا المواقف الصعبة اللي مروا بيها، لحد نجاح العملية، برغم استشهادهم كلهم في النهاية.

عملية عنق الزجاجة، اللي قرأ رجل المستحيل، أكيد قرأ العدد 11 من الأعداد الخاصة، واللي بيحكي عن مشاركة أدهم صبري في حرب أكتوبر، وإنه قدر لوحده يمنع الإمدادات عن جيش العدو، وحماية قائد كتيبته، اللي تعرض للإصابة.

روايات الرجل المستحيل

البطولات ما خلصتش، والروايات ما وقفتش لحد هنا وطول ما فينا نفس، هنكتب الحكاية.. حكاية الملحمة...