عملت أغنية "حبيبى الأولانى" لحبيبتى اللى ماتت زمان.. أسرار فى حياة رامى صبرى.. فيديو

"كنت طالب فى معهد الموسيقى وحبيت بنت فى معهد الباليه وكان عندى وقتها 20 سنة وهى 16 وكنا وقتها بسطاء وبنركب الأتوبيس وكانت أول واحدة قلبى دق ناحيتها"، بهذه الكلمات حكى النجم رامى صبرى خلال حلوله ضيفا فى برنامج  صاحبة السعادة" مع النجمة إسعاد يونس عن أول حب فى حياته وسر ارتباطها بأول ألبوماته الفنية "حبيبى الأولانى".

وقال: "كنت غاوى شغل جدا وعندى طاقة كبيرة، وهى دعمتنى وقالت لى لازم تنجح وفجأة توفيت البنت وما كنتش لسه غنيت وقعدت 3 أو 4 شهور عندى مشكلة نفسية وما بقتش عارف أنام وأعيط وأسمع مزيكا وكنت فاكر إن دى اللى هاتجوزها ولما توفيت قلت لازم أعمل اللى كان نفسها إنى أعمله وسميت أول ألبوم وأغنية ليا "حبيبى الأولانى".

وعن عدم ظهوره بشكل كبير فى الإعلام صرح رامى صبرى، قائلاً: "بحب الناس تسمعنى أكتر ما تشوفنى وفى مصر البرامج الفنية مش كتيرة".

وعن اتجاهه للإنتاج قال رامى صبرى: "قررت أنتج لنفسى من وقت ما بقى شركات الإنتاج بتحدد ميعاد نزول الألبوم وأنا بكون عاوزه ينزل فى وقت محدد وكمان فهمت إزاى الأغنية بتكسب".