أمينة خليل: كان فى مشاهد صعبة فى "شماريخ" ولكن مبسوطة بالتحدى

حل أبطال فيلم "شماريخ" ضيوفاً في برنامج "معكم منى الشاذلي"، الذى تقدمه الإعلامية منى الشاذلي على قناة ON، وقال المخرج عمرو سلامة: "كل فيلم بحاول اتعلم فيه حاجة جديدة، وبحب أطور من نفسي واحكى القصص بشكل مختلف وبحاول يكون الفيلم في جذابية وتشويق عشان ينجح جماهيريا".

وكشفت أمينة خليل عن أصعب المشاهد قائلة: "كان في مشهد معين في نص الصحراء والجو برد جدا، وفى بيت صغير من الخشب والمفروض نولعه نار، وبعد ما عمرو سلامة ولعه يقول يلا ادخلى جوا البيت، وبيتكلم بشكل عادى جدا أكنه أمر عادى، ومشهد تانى مثلا يقولى إنتى هتقفى وفى تعلب هيلف حواليكي وبيتكلم بشكل يحسسك إنك عادى بس أنا ببقى مبسوطة أكتر لما بيكون التحدى أقوى".

وقال آسر ياسين: "فيلم شماريخ أكتر فيلم كان في أماكن تصوير ومفيش لوكيشن قعدنا في أكتر من يوم أو يوم ونص، ودى حاجة جميلة ولكن متعبة جدا لينا وله وإنتاجياً كمان، وكان في مصمم معارك عشان نقدر نعمل أكشن منسق بس يبان عشوائي وده تطلب مجهود كبير جدا ودى فكرة ذكية من عمرو سلامة".

وقال عمرو سلامة: "كنت بحب أجرب كل حاجة بإيدى سواء الألعاب النارية أو سلاح النار عشان أشوف عادى ولا لأ قبل ما يجربها الممثلين عشان أكون موفر لهم الأمان، لأن مقدرش اطلب منهم حاجة وهى مفيهاش أمان".

وتابع عمرو سلامة: "فكرة الشماريخ جاتلى كنت في مرة بالبيت وكان في احتفال في الشارع بالألعاب النارية، فأول لما بنسمع الوصت بنشعر انه طلق نارى ولا ألعاب نارية، ووقتها كلبى لقيته بيرتعش وخايف بشكل مرعب، فجتلى فكرة ان رغم احتفالية لكن فيها رعب".

فيلم "شماريخ" بطولة آسر ياسين أمينة خليل، خالد الصاوي، آدم الشرقاوي، مصطفى درويش، وسالي حماد، وعدد من ضيوف الشرف منهم محمد ثروت وهدى المفتي، والعمل من تأليف وإخراج عمرو سلامة، تدور أحداثه في إطار أكشن ومطاردات، حيث يحدث ظرف ما يجمع بطلى الفيلم ويجعلهم في خطر كبير فيتحدون لكيفية التخلص منه.