شعارها "الفلوس مش أهم حاجة".. شاهد حكاية "أم حنين الخياطة"

"لا يعرفن للمستحيل طريق.. هن ستات مصر المكافحات"، كثيرا من القصص التي نتناولها حاليا تتحدث عن المرأة المصرية من نجاح ورحلة كفاح مبهرة ألهمت العديد من سيدات العالم، ونضال فى كافة المجالات على مدى التاريخ، وفى قصتنا هذه نتحدث عن واحدة من هذه السيدات المكافحات التي شقت طريقها من أجل لقمة عيش بالحلال هي "أم حنين الخياطة".

وتقول "أم حنين"، "كنت شغالة فى مجال تانى غير المجال اللى انا شغالة فيه حاليا ده بس مكنتش لاقيه نفسى فيه، وقررت أشق طريقى وابحث عن ذاتى واتعلمت مهنة انا بحبها وهى الخياطة ومش بس اتعلمتها انا طورت نفسى فيها جدا وبدأت أبدع في صنع الأشياء اللى انا بعملها من صنع إيدى".

وتابعت: "المهم في أى مهنة مش انك تتعلمها الأهم إنك تبتكر وتبدع وتضيف ليها، وهنا انت بتحط لمستك اللى بتوصل للناس وبيعرفوا ساعتها إنك صنايعى شاطر ومبدع وبيتعاملوا معاك ساعتها بثقة وبيجبولك كمان زباين من أماكن تانية".

واستكملت: "اما فيما يخص الأسعار انا اللى بيجيلى معاه واللى مش معاه عندى زى بعض، الفلوس مش هي اهم حاجة، الرزق ده بتاع ربنا والخير اللى بتعمله هتلاقيه، في أيام مكنش بيجيلى زبون واحد ويجى على اخر اليوم زبون يعوضك اليوم كله وده ترتيب ربنا وطول ما انت فاهم ان محدش هياخد رزقك فا انت هتبات مرتاح".