عيد الأم .. سألنا الشباب عن أبرز الهدايا المقدمة لأمهاتهم

عيد الأم يمكن أن يكون يوم شكر وتقديم بعض الهدايا والكلمات الطيبة للأم، لذا تواصل "اليوم السابع" مع عدد من الشباب والبنات لمعرفة أبرز الهدايا التى تم تقديمها.

طقم كوبيات عيد الأم

طقم الكوبيات

قال محمود أحمد: "أنا اشتريت لأمى طقم الكوبيات بجانب بعض الحاجات الضرورية التى تحتاجها فى المنزل وجبت كرتونة رمضان، بصراحة الكل استغربنى من طقم الكوبيات لكن دا الواحيد اللى بيخلينى أحس بعيد الأم بجد بعيدًا عن أنه أول هدايا قدمتها فى عيد الأم وأنا طفل كنت وقتها طاير من الفرحة.

هدايا عيد الأم خزين خضار

خزين رمضان من الخضار

فيما قالت سهى: "بصراحة أنا كل سنة بأخذ الفلوس من أمى وأشترى ليها الهدايا أو أنزل معها ونختار سوا والدفع عليها، لكن السنة دى كانت مختلفة قبضت جميعة وجبت خزين البيت وحقيقى كانت طايرة من الفرحة، بصراحة البيت كله كان فرحان إنى قدمت حاجة تكون حاجة مفيدة.

عزومة على الغداء

وتحكى هاجر أحمد: أنا وأخواتى فكرنا نروح كلنا نتغدا برة ونتجمع مع بعض لأن كل حد فينا عايش فى مكان للأسف.

خاتم ذهب

ويقول معتز: "أنا أخدت من بابا 2000 جنيه وكملت عليهم وجبت خاتم ذهب لأن كان نفسى من زمان أشترى هدية ذهب لأمى لكن ماكنتش عارف إزاى والحمد لله تمت المهمة بنجاح.

فراخ ولحمة

وتقول أسماء: "روحت لأمى أنا وأولادى وأخدنا فراخ ولحمة وأكدت عليهم أنها الزيارة خاصة بعيد الأم، كل طفل من أولادى خاليتهم يقدمولها هدايا بسيطة عشان يتعودا على العطاء".

فسحة وأكلة من أيدى

فيما قال أحمد جمال: "جبت زجاجة برفان، وأخدتها فسحة وعملت سيشن للذكرى، واخترت فى اليوم دا أدخل أنا المطبخ أحضر شوية أكلات مفضلة لديها، لأني عايش أنا وأمى فقط، بحاول أسعدها، بالإضافة أن كل يوم يعدى عليا وأمى معايا وبخير فهو يوم عيد.

ملايات وكوبيات وطقم حلل

لكن رقيقة كانت لها رأى آخر وقالت: "جبت ميلايات السرير والكوبيات فكرت أننا داخلين على رمضان والعيد وأمى فى أمس الحاجة لبعض الأشياء المهمة بالإضافة إلى طقم الحلل، وكنت فاكرة حماتى فكنت حريصة أن الهدايا تكون نفس الشىء بالفعل اشتريت لأمى وحماتى نفس الهدايا".

طقم ملايات