حكاوى القهاوى.. حكاية عم "خضير البورسعيدي" أشهر خطاط في مصر

استضافت الإعلامية رشا الجمال، خضير البورسعيدي، أحد أشهر الخطاطين في مصر، والذي قال إن مدينة بورسعيد هي أهم شيء في حياته، وبالتالي تم تسميته بهذا الاسم، من شدة حبه لها.

وأضاف خضير البورسعيدي، خلال لقائه ببرنامج حكاوى القهاوى، الذي يذاع على القناة الأولى المصرية: "المنطقة هنا شبه بورسعيد، عشان كدة جيت هنا، الجمالية، الناس هنا شبه ناس بورسعيد، أنا أول مرة جيت هنا كان سنة 1958، كنت جاي أشترى حاجات من مطبعة، ودلوني على مكان غلط، وبعد ما جيت الحسين، حد جابني هنا الجمالية، ومن يومها وأنا هنا، الناس هنا مبروكة من الحسين".

وتابع: "أول حاجة كتبتها كان عندي 6 سنين، وكانت جميلة (من يتعامل مع الاستعمار فله الموت) مش عاوز حد يروح يشتغل عندهم، وهما كان معسكراتهم موجودة، بنعدي من سكة واحدة، فكنت بلم صحابي الأطفال ونحدفهم بالطوب، وكان بيتقبض علينا في السن ده ونتحبس، وعلشان يقيدوني أخدوا قلمي".

وقال: "فتحت مكتب وأنا عندي 8 سنين، كان معايا ولد أبوه عنده يافطة، فعيط لأبوه عشان أنا اللي أكتب على اليافطة، وفعلا روحت وكتبت على اليافطة، طلعت على السلم وقولتله لو معجبكش أول كلمة، همسح وخلي حد تاني يعملها".