الرئيس السيسى بالمؤتمر الوطنى للشباب فى برج العرب بالإسكندرية: ميناء أبو قير يضم 10 كم أرصفة ولا يوجد مثله إلا فى إسبانيا.. و400 ألف وحدة سكنية غير صالحة بالمحافظة.. والإسكان البديل يكلف الدولة 150 مليار جنيه

قال الرئيس عبد الفتاح السيسي، إن ميناء أبو قير، فى الإسكندرية، يضم أكثر من 10 كيلومترات أرصفة، منها رصيف على عمق 22 مترا، وهذا الرصيف المصري لا يوجد مثله في العالم إلا في إسبانيا، متابعا: "هناك 7 ملايين متر موجودين مباني داخل البحر، يعني هيتعمل كورنيش جوه البحر بطول 8 كيلو أي ما يعادل نصف كورنيش الإسكندرية".

وأضاف الرئيس السيسي في كلمته بالمؤتمر الوطني للشباب ببرج العرب بالإسكندرية: "حجم العمل المطلوب في الدولة المصرية كتير جدا، والمطلوب فيكي يا مصر عايز عمل ليل ونهار عشرات السنين بلا كلل ولا ملل، ولا الدكتور معيط يقولي مافيش فلوس، يعني أنا عايز أطمنكم إننا ماشيين كويس".

وأكمل الرئيس السيسي: "كان فيه شاب في البحيرة بيقول لي طمني يا فندم على الشباب، قلت له يا محمد إحنا بنقول فيه 2.2 مليون أو 2.5 مليون فدان بنزرعهم أو هنزرعهم بالكتير على آخر السنة الجاية، يعني قد البحيرة كلها مرة وشوية".

وأردف الرئيس: "أنا عايز أقولكم على حاجة.. أوعوا تفتكروا إن فيه حد هيتحرك يبني ويعمر ويصلح لأجل خاطر الناس، وينضام، دا اللي بيطبطب على حد ربنا بيديله حسنة، واللي بيشيل حاجة من الأرض شوكة ولا طوبة ربنا بيديله حسنة، فاللي هيغير حياة بلد ينضام؟ لا ماينضامش".

وقال الرئيس عبدالفتاح السيسي، إن قوائم الانتظار تساهم فى حل المشاكل الصحية للمواطنين بدلا من انتظارهم شهورا أو سنين.

وأضاف الرئيس السيسي خلال كلمته بالمؤتمر الوطني للشباب في الإسكندرية: قوائم الانتظار تساهم في تدريب الأطباء من خلال حجم العمل المتزايد لأن قوائم الانتظار بتبقا دايما حالتها صعبة.. لما النهاردة خلال 4 سنين حجم قوائم الانتظار داخل في 2 مليون حالة معناه إن أنا وفرت للأطباء إنهم يتشغلوا بشكل مكثف جدا فى حالات حرجة فى كل التخصصات".

وتابع الرئيس: "احنا بنتكلم مش الأرقام كبيرة.. الفكرة كلها إن فيه كتير من الموضوعات لو كانت اتعملت في أماكن جديدة خالص مكنتش هتكلفنا التكاليف دي كلها نضطر نصلح في اللى احنا عملناه.. بنحاول نصلح ثم نبني ونطور اللى احنا بنعمله والمكان الجديد أفضل كتير من الدخول في التخطيط السابق الذى تم تجاوزه من دون أن نوزع اتهامات ..لكنا احنا موجودين علشان نصلح ما أمكن أى حاجة يمكن نعملها".

عن محور الإسكان، تحدث الرئيس قائلا: "هتكلم على الإسكان كأحد المشاكل المزمنة من 300 - 400 ألف وحدة سكنية غير صالحة.. لو بنتكلم عن تكلفة هذه الوحدات لو حبينا نعملهم إسكان بديل بنتكلم لـ 300 ألف 150 مليار علشان تقول للناس إن المبنى ده غير صالح وغير قابل للإصلاح يبقا هبنيله وبعد كده أهد ده علشان غير صالح".

وتابع الرئيس: "المشارف" كانت موجودة على أرض سبخية بدل ما كنا بنينا في الإسكندرية ولو كنا عملنا اللى احنا عملناه خلصنا 500 فدان وبنردم 1000 فدان تانيين فى منطقة العامرية واحنا بنعمل ده بطريق علشان يتربط على الصحراوى".