الرئيس السيسى يخاطب المصريين من البحيرة: المرحلة الأولى لمبادرة حياة كريمة تخطت 350 مليار جنيه.. الأزمة الروسية رفعت الأسعار ونحاول تخفيف آثارها.. التموين يمس 70 مليون مصري.. واستقبلنا 220 ألف سودانى فى 7أسابيع

حرص الرئيس عبد الفتاح السيسي، على فتح نقاش مع الأهالي بقرية الأبعادية في محافظة البحيرة، قائلا: "سعيد إن أنا أشوفكم النهارده وأفطر معاكم.. اللي أنا شفته النهارده في القرية يعني يخلينا نُصِر ونستمر بفضل الله سبحانه وتعالى في اللي إحنا بنعمله ده لغاية ما نخلص كل قرى الريف المصري مش بس المرحلة الأولى".

 

وأضاف الرئيس السيسي: "شوفوا الكلام ده بقولوا ديما وقلته من بدري أوي.. قلت إن إحنا ماحدش يقدر يعمل حاجة لوحده.. لا حكومة ولا رئيس ولا مؤسسات لكن نقدر مع بعض.. وأنا قلت الكلام ده.. قلت إن إحنا التحديات الموجودة جوه مصر كتير وزي ما شفتوا لما بدأنا في حياة كريمة الرقم كان في البداية 200 و250 مليار.. والموضوع دلوقتي وصل لـ350 مليار دلوقتي للمرحلة الأولى وقلنا المرحلتين التانيين هيكملوا أكتر من تريليون جنيه يعني ألف مليار".

 

وأشار الرئيس عبد الفتاح السيسي، إلى أن مصر يعيش بها نحو 9 ملايين ضيف، موضحًا: "نتيجة فضل الله علينا والأمن والسلام اللى عايشين فيه... فيه 9 مليون ضيف وفى الـ 7 أسابيع اللى فاتوا عبر نتيجة الظروف فى السودان أكثر من 220 ألف إنسان دخلوا علشان الظروف الموجودة".

 

وأضاف الرئيس السيسي على هامش جولته بمحافظة البحيرة: " بالمناسبة للأشقاء فى السودان وأى بلد تانى ..خلوا بالكم من بلدكم.. وبقول الكلام ده لأنى شوفت لما حصل مشاكل في بلاد أخرى الناس مقدرتش تقعد وسابت بلدها وجت عندنا وراحت حتت تانية ..مش هقول دول علشان ما احرجش حد.. لكن اعرفوا أن الدول اللى حصل فيها مشاكل واقتتال جه منهم عندنا ملايين هنا عايشين معانا.. طيب احنا ظروفنا صعبة.. كنا ممكن نقول لا.. ولكن بيخشوا المدارس بتاعتنا والمستشفيات وبنتشارك الموجود .. واللى موجود مش كتير .. لكن احنا بنتشارك فيه".

 

وأكد الرئيس عبدالفتاح السيسي، على أن مصر تعيش أزمة منذ 3 سنوات، حيث بدأت بموضوع كورونا"، متابعا:" ده طبعا كان له تأثير كبير قوى على مصر والعالم واحنا في مصر موقفناش، طيب جت الأزمة الروسية وكان ليها تأثير كبير علينا وعلى الاقتصاد العالمي؟ ..أيوه.. يمكن تكون بطأتنا شوية، يمكن تكون غلت الأسعار وغلتها كتير، بس عاوز أقولكم على حاجة، خلوا بالكم برضو في الـ 3 سنين اللى فاتوا زدنا 6 مليون، مقصدش بالكلمة دي أى حاجة، لكن بحط الصورة جنب بعضها".

 

وأضاف "بنحاول نخفف من آثار الأزمة اللى بنتكلم عليها بقالها 3 سنين، دى مدة مش بسيطة في عمر دولة بتقاوم أزمة كبيرة جدا، مش على مستوى مصر، لكن على مستوى العالم كله، ولها تأثير على دول اقتصادها أقوى مننا ودول غنية".

 

حرص الرئيس عبد الفتاح السيسي، على مخاطبة الشعب المصري خلال زيارته لقرية الأبعادية بمحافظة البحيرة، ووجه رسالة للمزارعين قائلا: "الأرز اللي بشتريه منكم بيروح للتموين.. والتموين بيمس 70 مليون مصري، والمزارعين لما لقوا فرصة أحسن باعوه! رغم إني كنت باخد الأرز وأبيعه مدعم".

 

وفيما يتعلق بالقمح، قال الرئيس السيسي في كلمته: "الإنتاج في مصر ممكن يبقى 8 أو 9 أو 10 ملايين طن.. وحد يقولي أصل إحنا في ريف، عندنا القمح في البيت بنعمل بيه مناسبات.. اللى خدناه لحد الآن 3.5 مليون طن يبقى لسه في البيوت فيه 6.5 مليون طن، طب المخابز بتاعة الناس بتبيع للناس كلها، الرغيف بيتكلف 80 قرش وببيعه بـ5 قروش، وأنا مش باخده هبيعه بتمنه، لكن لو حد تاني خده هيتاجر فيه".

 

وأكد الرئيس السيسي، على أنه يحرص على ألا يقل الاحتياطي السلعي عن 5 و 6 أشهر، قائلا: "حرصنا على الاحتياطي مايقلش عن 5 أو 6 شهور، يعني رصيد الرز والقمح والزيوت واللحوم والدواجن ماتقلش عن 6 أشهر علشان ما تحصلش أزمة، وأنا كنت هاخد القمح بالسعر اللي قلت عليه وهديه للناس مدعم بـ5 قروش، ولو أنا النهارده مالقتش الطلب ده موجود في الـ10 ملايين طن اللى فى مصر، هضطر أشتري من بره والموضوع ده هيبقى له تأثير كبير على الأسعار في مصر بسبب الدولار.. كل ما يكون فاتورتي من الدولار في تزايد، سيكون هناك عبء على الاقتصاد".

 

وقال الرئيس عبدالفتاح السيسي: "قبل ما أجيلكم عديت على دار مسنين كنت في حالة تانية خالص والناس الكبار ليهم عند ربنا مكانة.. هتجدوا طاقة جميلة جدا رحمات ربنا مع الناس الأفاضل".

 

وأضاف الرئيس السيسي "اطمنوا بفضل الله سبحانه وتعالي مسيطرين على الأمور وماشية.. ولازم زى كل حاجة بتحصل في دنية ربنا.. وكل حاجة ليها بداية وتنتهى.. أى أزمة بتعدي بفضل الله وكنت منتبه قوى في مسيرة عمرى على الأزمات اللى عدت علينا في مصر وكنت بقول معقول الحاجات دي هتخلص؟.. وخلصت .. واللى احنا فيه بفضل الله وفضلكم هنعدي من كل الأزمات وهنبقا أحسن.. وأتصور لو هتشوفوا الريف زمان كان شكله عامل إزاى؟.. مش كانت الناس بتاكل الذرة صفرا ولا إيه؟ والشعير؟.. مع الوضع في الاعتبار إن الريف كان شكله جميل لما كان العدد مش ضاغط ..لكن دلوقتي الدنيا اتغيرت خالص وده امر نحبه ونجرى عليه اكتر من كده".

 

وتابع الرئيس: "كنت بقول النهاردة ان الترعة اللى اتبطنت هتعود علينا كلنا طالما انت سعيد يبقا انا مبسوط والا ابقا ان مش منكم .. لو فرحتكم متفرحنيش يبقا انا مش منكم ولو زعلكم ميزعلنيش يبقا انا برضه.. اومال احنا موجودين ليه؟.. احنا بخير وهنبقا بخير اكتر وبيكم وجهدكم وتحملكم هنبقا بخير اكتر يا رب يحفظنا كلنا".

 

وأكد الرئيس عبد الفتاح السيسي، أن الريف المصري كان يغطي من حوالي 40 أو 50 سنة كل احتياجاته الغذائية، بعكس ما يحدث حاليا.

 

وأوضح الرئيس السيسي في كلمته للأهالي بقرية الأبعادية: "الريف من 40 سنة و50 سنة كان بيغطي حاجته.. هل حد كان بيجيب زيت.. ده كان عيب جدا في الريف.. يقولك معقول هاكل بزيت وهو بيستخدم سمن بلدي، هل حد كان بيشتري زيت ولا بيض ولا فراخ؟ البيوت كانت وحدات إنتاجية صغيرة".

 

وأكمل الرئيس السيسي: "الريف كان بيطلع جزء للحضر لعواصم المحافظات منتجات، ده دلوقتي مش بيحصل بالمستوى اللي كان موجود، والدولة النهارده معنية بتغطية كل الطلبات، لأن إحنا اتحولنا من حالة كنا موجودين بيها قبل كده لحالة تانية، وبنقول ليه ظروفنا والأسعار كانت كده؟ إحنا بنتكلم في بلدنا مصر كنا لغاية 1952 حوالي 19 أو 20 مليون مصري في كل مصر ريف وحضر، ثم في عهد السادات وصلنا لـ40 مليون، وبعدين في 2011 كنا 80 مليون، والنهاردة إحنا 105 وإحنا بندردش مع بعض دلوقتي فات كام دقيقة؟ لأن كل 15 ثانية في مولود يعني كل دقيقة 4 مواليد، المواد موجودة وحتى لو كانت غالية شوية ومش ممكن أبدا ننزل نقول مافيش.. أنا بكلمك عن احتياجات 105 + 9 مليون ضيف يعني 114 مليون مواطن في مصر.. بنحاول بس بيكم وبجهدكم ودعمكم وقبل ده كله بدعواتكم.. الناس الطيبة كتير في مصر".

 

أكد الرئيس عبدالفتاح السيسي، أن الجامعات التي تم إنشاؤها خلال الـ 6 سنوات الماضية تكفى الطلب على التعليم حتى العام 2050.

 

أضاف الرئيس السيسي ردا على طلب احد الأهالي بإنشاء فرع لجامعة الازهر بالمنطقة: "الجامعة دي علشان تتعمل على 22 فدان هيبقا فيها تخصصات مختلفة.. بس الجامعات اللى اتعملت على مستوى الدولة خلال الـ 6 سنين اللى فاتت تكفى الطلب على التعليم لغاية 2050".

 

وتابع الرئيس السيسى حديثه: "عاوز تعليم سواء أزهر أو غيره ممكن اقولك حاضر وندرس.. بس أنا متعودتش علي كده.. اتعودت على إنى أتكلم معاكم بموضوعية".

 

أكد الرئيس عبدالفتاح السيسي، أن الدولة وفرت 16 مليار جنيه من أجل القضاء على قوائم الانتظار، مشيرا إلى أن بعض الجهات وفرت بضعة مليارات أخرى لهذا الغرض.

 

وأضاف الرئيس السيسي على هامش جولته بالبحيرة: "لما اتعرض عليا موضوع قوائم الانتظار من 4 سنين كانوا 12 ألف وكان ساعتها فيه جهات كتيرة اتبرعت لتنهى القائمة ..قوائم الانتظار لغاية دلوقتي علي مستوى الدولة المصرية كام؟ حد يعرف؟ ..دخلنا على 2 مليون والرقم اللى تم انفاقه حتى الان في قوائم الانتظار داخل في 20 مليار منهم 16 مليار الدولة وفرتهم وعدة مليار تجت من جهات كتيرة زى الازهر والبنوك ومؤسسات المجتمع المدني.. لكن بقولكم احنا كنا بنتكلم في 4 سنين في 12 الف ولما اشتغلنا عليه بقا 2 مليون في 4 سنين وكنت متوقع كده".

 

وتابع الرئيس: "الأزمة اللى عندنا فيها طلبات في كل شيء تعليم وصحة وطرق والسكة الحديد والكهرباء في أى موضوع هتجد .. لكن الإجابة يا ترى بفضل الله سبحانه وتعالي حجم عبورنا معقول ولا مش معقول؟ ..حاسين بكرم ربنا لينا ولا لأ؟..مش متوقفين عند 2 مليون ويا رب يستر علينا دايما".