وكيل شعبة الأدوات المكتبية: أسعار معرض أهلا مدارس أقل كثيراً من مثيلاتها

محمد حسن وكيل شعبة الأدوات المكتبية

كتبت - هديل البنا

الخميس، 31 أغسطس 2023 08:00 ص

أكد محمد حسن وكيل شعبة الأدوات المكتبية وألعاب الاطفال بالغرفة التجارية بالقاهرة، أن شعبة الادوات المكتبية ولعب الاطفال، هي جهة ليست رقابية، دورها الرئيسي هو تجميع التجار الذين يعملون في مجال لعب الاطفال والأدوات المكتبية، لتكون هي حلقة الوصل ما بين البلد والمستهلك.

وتابع وكيل شعبة الأدوات المكتبية ولعب الأطفال بالغرفة التجارية، مؤكدا أن الشعبة تعمل على رصد احتياجات المستهلك ايه وتقوم بتوصيل هذه الاحتياجات للتاجر، والعكس صحيح تقوم بتوصيل احتياجات التارج للدولة.

وقال محمد حسن: "السنة دي اكيد هايبقى في اختلاف عن السنة اللي فاتت في الاسعار، نظرا للظروف العالمية اللي العالم كله مر بيها. لكن بقدر الإمكان احنا كشعبة بنحاول نقلل الأسعار، وبنحاول بقدر الإمكان نشوف ايه اللي ممكن يكون في مصلحة التاجر ومصلحة المستهلك بحيث نقدر نعدي الفترة دي من غير ما المستهلك يحس إن فيه فرق كبير جدا في الأسعار".

وعن دور معارض أهلا مدارس اللي بتقدمها الدولة لدعم المواطنين، قال وكيل شعبة الأدوات المكتبية: "دور المعارض دي إن التاجر ما بيتحملش القيمة الايجارية بتاعة المكان، الغرفة هي اللي بتتحمل القيمة الإيجارية بتاعة المكان، وده بيقلل من السعر، يعني لو التاجر بيعمل حساب الموضوع ده في مكانه بيتحمل قيمة الإيجار، لكن في المعرض بيبقى الموضوع مختلف شوية".

وتابع محمد حسن قائلا: "المعرض مش بيقدم الأدوات المكتبية بس، المعرض بيضم خمس قطاعات".

وعن العوامل التي تؤثر على سعر الأدوات المكتبية، قال محمد حسن: "خلينا نتكلم إن طبعا سعر الدولار اختلف عن السنة اللي فاتت.أيضا سعر الشحن اختلف عن السنة اللي فاتت، بالنسبة للورق مثلا كان فيه بعض الحاجات كانت معلية سعر الورق جدا جدا،عالميا طبعا، الغابات اتحرقت في الدول اللي بتصنع الورق، المصانع اللي فترة كورونا كانت بالفعل قفلت، ودلوقتي رجعت تفتح تاني وتشتغل تاني. فده طبعا كان بيقلل المعروض. فبالتالي بيزود السعر".

وأضاف محمد حسن قائلا عن قطاعات معرض أهلا مدارس: "القطاعات اللي في معرض اهلا مدارس، احنا عندنا قطاع الأدوات المكتبية ولعب الأطفال، طبعا ما يبقاش فيها لعب اطفال هي ادوات مكتبية بس عندنا قطاع الملابس، قطاع الكمبيوتر ، كل ما هو بقى متعلق بالكمبيوتر واللابتوب والحاجات دي، عندنا قطاع بتاع الاحذية والشنط ، ده طبعا غير المواد الغذائية اللي بتخص الساندوتش وبيبقى فيها بقى الحاجات اللي الولاد بتاخدها وهي ماشية في المدرسة، ودول الخمس قطاعات الرئيسية اللي المعرض بيقوم عليهم. علشان كده المعرض بيبقى اداة استقطاب للمستهلك انه بيخش مكان واحد بيلاقي فيه كل اللي هو محتاجه بسهولة".