كريم عفيفي يروى موقفًا كوميديًا جمعه بابنه فى عرض فيلم مطرح مطروح

حل الفنان كريم عفيفي، ضيفًا في برنامج "الراديو بيضحك" المذاع على إذاعة 90.90، تقديم الإعلامية فاطمة مصطفى، وكشف عن موقف كوميدى جمعه بابنه في العرض الخاص لفيلم "مطرح مطروح" قائلاً: "ابنى حمزة فضحنى في العرض الخاص".

وتابع كريم عفيفي: "كنا قاعدين وبنتفرج على الفيلم وفى مشهد ضرب نار وواحد مات وهو راح قايل بصوت عالى طبعا ده صوت والراجل أكيد مماتش، وكمان في جملة بقولها في الفيلم راح سألنى بصوت عالى يعنى إيه".

وأضاف كريم عفيفي: "ابنى حمزة عنده 3 سنين ونص، ولما بيشوفنى على التليفزيون بيكون مبسوط، وأولادى عندهم ميول للتمثيل وبروح لهم في المدرسة بشوفهم بيعملوا عروض فيها اللى هي عروض بسيطة بتاعة الأطفال بس بتكون بالانجليزى، فبكون مبسوط وبقول الفلوس مراحتش هدر".

وعن تركيزه بالسينما بشكل أكبر هذه الفترة قال كريم عفيفي: "كنت مركز في الدراما وعملت اللى شايفه حلو وخلاص بقيت مبسوط ومكانش ليا حاجات سينما كتير، فقررت أركز في السينما لان هي اللى بتعيش وبتكمل، وبعد كام سنة محدش هيتفرج على مسلسلات، وكله هيتفرج على افلام عشان مدتها ساعة ونص".

فيلم مطرح مطروح بطولة محمود حميدة، كريم عفيفى، ليلى أحمد زاهر، شيماء سيف، طارق الابيارى، سامى مغاورى، محمد السعدنى، شريف ثروت ومحمدى القاضي وتأليف محمد عز وإخراج وائل إحسان، وتدورالأحداث في إطار من الحركة والكوميديا، خلال فترة الأربعينيات في مصر، حيث تتسبب الصدفة في تعرض موظف مصري وعائلته للخطر أثناء نشوب حرب ما، وسرعان ما يحدث صراعًا بين الأسرة وقوات الجنود الأجنبية.

فيلم مطرح مطروح يشارك في بطولته الممثل البريطاني سكوت آدكينز الشهير بـ "بويكا" ليسجل مشاركتة الثانية في السينما المصرية بعدما ظهر لأول مرة في فيلم "حرب كرموز" مع النجم أمير كرارة والذى تم عرضه عام 2018 وجسد فيه دور شاب إنجليزى كان مسجوناً وتم الاستعانة به في الحرب ضد الضابط المصرى وزملائه، وحرص وقت تصوير الفيلم على زيارة الأهرامات ونشر صور له من أمامها