أستاذ آثار يكشف لتليفزيون اليوم السابع تفاصيل ترميم مأخذ سور مجرى العيون.. فيديو

جانب من التغطية

كتبت - هديل البنا

الجمعة، 01 سبتمبر 2023 12:00 ص

أكد دكتور جمال عبدالرحيم أستاذ الأثار الإسلامية بجامعة القاهرة وأيضا عضو اللجنة الدائمة للأثار، أن الدولة بدأت افتتاح سور مجرى العيون بعد ترميمه، والذي كان ينقل المياه من نهر النيل إلى قلعة الجبل مباشرة، في الماضي.

وقال دكتور جمال عبد الرحيم: "شرف لي اني اكون مرافق لدولة رئيس مجلس الوزراء الدكتور مصطفى مدبولي، وبدأنا الحمد لله النهاردة بافتتاح، ترميم سور مجرى العيون، و اللي كان بينقل الماية من نهر النيل الى قلعة الجبل على طول مباشرة، واللي فكرته بدأت من العصر الأيوبي ولكن ما تبقى منه يرجع إلى العصر المملوكي، خاصة أيام السلطان الأول ثم السلطان طنطاوي الغوري".

وأضاف دكتور جمال عبد الرحيم قائلا: "سور مجرى العيون وصل لمرحلة من الإهمال التدريجي، أولا بسبب المدابغ اللي كانت موجودة والعشوائيات اللي كانت موجودة فيه،ولكن المجلس الأعلى للأثار ووزارة السياحة والأثار، بذلوا جهد وفير مشكورين جدا، للتغلب على هذه العشوائيات".

وتابع دكتور جمال عبد الرحيم قائلا:" لازم نبين هذا الدور، لكل من يزور مصر، حتى المصريين، والعرب والاجانب، ونعرفهم ازاي الماية كانت بتوصل للقلعة اللي كانت تالت مقرك للحكم في مصر ابتداء من 1136 ايام صلاح الدين الأيوبي ولغاية 1874 أيام الخديوي اسماعيل لما ترك القلعة وبنى قصر عابدين".

وأضاف دكتور جمال عبد الرحيم قائلا: "بصي حضرتك، مشكلة الاثار الإسلامية في مصر كلها، مشكلتها حاجتين، إن أغلبها في القاهرة، ودي الحاجة الأولانية لأنها داخل المجتمع أو المجمع السكني بتاع أهالينا المصريين، ده نمرة واحد، وطبعا حضرتك لابد وانا باقول أهو لابد وبصراحة وده شيء معروف، إن فيه ناس كتير اوي اوي اوي عندها وعي. وفي ناس تانية الوعي عندها محتاج يزيد شوية، مش هنقول ما عندهمش وعي. لأ محتاج شوية، ودي مطلوبة اوي إن اهالي المناطق اللي فيها الاثار وبتترمم، يكون الوعي أكتر من خلال السوشيال ميديا ومن كل الوسائل التاينة".