أبطال "عصابة عظيمة" يحتفلون بالعرض الخاص للفيلم.. إسعاد يونس: كنت بسترجع تدريباتى مع عمار الشريعى للشخصية.. محمد محمود: إسعاد إنسانة عظيمة.. عنبة: شكرا إنها وثقت فيا.. وكريم عفيفى: مغامرة محسوبة

أبطال فيلم عصابة عظيمة

سارة صلاح

السبت، 06 يناير 2024 01:00 ص

احتفل أبطال فيلم "عصابة عظيمة" بالعرض الخاص للفيلم فى إحدى سينمات القاهرة الجديدة، وحضر كل من النجوم إسعاد يونس ومحمد محمود ووائل إحسان وفرح الزاهد وعنبة، وكريم عفيفى وهاجر الإبيارى، وحرص كل من شريف سلامة وداليا مصطفى ومحمد ثروت ودياب وألفت إمام الحضور لتهنئة أبطال العمل.

وأقيم مؤتمر صحفى لأبطال العمل بعد عرض الفيلم، وأشادت النجمة إسعاد يونس بموهبة عنبة فى التمثيل مما جعله يبكى وصفق له كل الحضور.

وقالت النجمة إسعاد يونس: "متشرفة بكل شخص اشترك فى الفيلم واتشرفت إنى اشتغلت مع المخرج وائل إحسان لأول مرة، واستفدت منه، وعنبة اكتشاف، والنجمة يسرا لما رشحته فى الفيلم كنت متأكدة إننا هنلاقى موهبة عظيمة فى عنبة، وإن يسرا أكيد كانت شايفة فيه حاجة كويسة".

وعن تحضيرات إسعاد لشخصية عظيمة وتقديم دور الكفيفة قالت: "رحلة وسنين طويلة مع صديق العمر الراحل الموسيقار عمار الشريعى، وكان فى الشقة اللى قدامى الدكتور أحمد يونس، كان عندى علاقة قوية مع المكفوفين، واتمرنت إنى عايشة معاهم وعيشت سنين كتير مع عمار، وكان بيمرنى فعلا كيف أستشعر الحركة والصوت أذنى إزاى تعرف اتجاه الريح واللمس، وده كان موجود معايا فى التدريبات بسترجعه".

وقال محمد محمود: إسعاد يونس بحبها على المستوى الإنسانى قبل المستوى الفنى، وضربتنى كتير فى الفيلم وقعدت تقول لوائل إحسان مش هضربه تانى عشان الناس بتحبه وهتكرهنى، هى إنسانة وفنانة فوق الوصف، وكلنا مهما تعبنا عاوزين نكمل وآخر يوم تصوير كنا زعلانين على الرغم من التعب، ومش عاوزين نخلص، وفى يوم واحد هى وقعت واتكسرت وأنا ذراعى اتصاب، ولكن كنا مبسوطين وبحب أميل لكوميديا الموقف مبحبش يبقى فى إفيهات جاهزة تتحط فى كل حاجة بعملها زى ما الشخصية بتودينى، والمخرج وائل إحسان بيطلع حاجات حلوة جواك، الراجل عبقرى".

وتحدث كريم عفيفى قائلا: "مغامرة محسوبة، كنت مطمئن جدا فى الفيلم وأنى بشتغل مع إسعاد يونس وبروح التصوير كل يوم عاوز أشوفها زى ماما فى البيت، وكنت مبسوط ومستمتع جدا بالتجربة".

وقال عنبة: "بشكر أى حد وثق إنى ينفع أمثل، وفى ناس كتير كانت بتحاول تحبطنى فى حياتى، وبشكر النجمة إسعاد يونس والمخرج وائل إحسان، وكل زملائى فى العمل، وبشكر أهلى ويا رب الفيلم يعجبكم".

وقالت هاجر الإبيارى: "النجمة إسعاد يونس اتحمست جدا لما عرضت عليها الفيلم كفكرة، وأخدت طاقة منها أطلع اللى جوايا، بجد بشكرها، وهى ست عظيمة وبشكر وائل إحسان أنه أخرج الفيلم".

فيما قال إبراهيم سمان: "مشاركة بسيطة لكن مهمة بالنسبة ليا، وإضافة لأى حد أنه يشارك فى فيلم بطولة إسعاد يونس وإخراج وائل إحسان، وسعيد جدا بالتجربة وبشكر النجمة إسعاد يونس أنها وثقت فيا وفى الشباب".

فيلم "عصابة عظيمة" بطولة إسعاد يونس، محمد محمود، كريم عفيفى، رنا رئيس، عنبة، فرح الزاهد، محمد ثروت، عارفة عبد الرسول، وغيرهم من الفنانين، والعمل من تأليف هاجر الإيبياري، وإخراج ائل إحسان.

وتدور الأحداث في إطار كوميدى حول امرأة كفيفة تُدعى (عظيمة)، والتي يقوم بدورها النجمة إسعاد يونس، ويتم النصب على ابنها (كريم عفيفى)، فيشكلون عصابة لمحاولة إنقاذ الموقف.