الكاتبة ريم بسيوني لـ"معكم": رواية الغواص استغرقت كتابتها أكثر من 6 سنوات

قالت الكاتبة والروائية ريم بسيوني، إن روايتها الأخيرة "الغواص" استغرقت مدة كتابتها أكثر من 6 سنوات، مشيرة إلى أن تلك الفترة شهدت بحثا ومذاكرة شديدة لشخصية عبقرية كـ أبو حامد الغزالي.

وأضافت خلال لقائها مع الإعلامية منى الشاذلي، ببرنامج "معكم" الذي يذاع على قناة "on": "كان في عندي رهبة، وكانت أصعب رواية كتبتها في حياتي، لأن أبو حامد الغزالي كان عبقري، أنا كنت بفكر، العبقري هيعيش مع مراته وعياله ازاي، هيتكلم معاهم ازاي، هو شخصية مش زي أي حد عرفناه، أتقن علم الفلسفة والكلام وعلوم الفقه والصوفية والمنطق".

وقالت: "أنا درست كل كلمة هو بيقولها، وكنت بدور في مراجع تانية ولاقيت الموضوع كبير أوي، وكنت كل ما أقرأ حاجة عنه، ألاقي حاجة جديدة، احنا لو بنطبق أفكاره عند التفكير النقدي حاليا، كنا هنبقى حاجة رائعة للغاية".

وتابعت: "أبو حامد الغزالي من الشخصيات القليلة اللي المؤرخين جابوا حياتهم غلط، فكانوا بيقولوا أنه عاش في زهد لمدة 10 سنوات وده مش حقيقي، هو ساب المنصب بتاعه لمدة عامين فقط، ورجع تاني للتدريس".