القصة الكاملة لخناقة رامى صبرى وويجز.. الأول: مش بفهم كلامه.. والثانى: أنت مش رقم 2 يا رامى أنت رقم 19.. وزوجة صبرى ترد: زوجى من أهم الفنانين فى الوطن العربى لكن أنت مش موجود على الخريطة أساسا

شهدت منصات السوشيال ميديا المختلفة ومحركات البحث خلال الساعات الماضية ذكر أسماء كل من المطرب رامي صبري ومطرب الراب ويجز، وانتشرت الكثير من الفيديوهات لكل منهما يرد على الآخر، ويظهر فيها بعض الانتقادات من الطرفين، وسرعان ما حرص جمهور كل من المطربين على التحدث عنه بطريقته الخاصة، حتى دخلت زوجة المطرب رامي صبري على خط المناوشات لترد على مطرب الراب ويجز.

رامي صبري ينتقد ويجز

بدأت القصة بظهور المطرب رامي صبري في أحد اللقاءات التليفزيونية ليرد على سؤال من المذيعة عن رأيه فى أغانى المهرجانات والراب، ليرد المطرب بشكل ساخر على أغاني المهرجانات ويصف أغاني الراب وبالتحديد أغاني "ويجز" بأنه مش بيفهم كلماتها، قائلاً "أنا مش بفهم كلامه ولحد دلوقتي مش بفهم، والشباب دي ناجحة من أول ما نزلوا، ولازم الناس تسمع أجيال تانية من الموسيقى".

ويجز يرد على رامي صبري: أنت رقم 19 يا رامي

وسرعان ما حرص مطرب الراب "ويجز"، على الخروج في ستوري عبر حسابه بموقع إنستجرام، ليرد على رامي صبري، وقال: "هتكلم عن فنان فاكر إن عنده صلاحية يتكلم على أي حد والناس تسمع وتسكت، الفنان دا اسمه رامي، رامي كل ما يقعد 4 أو 5 شهور يزهق يطلع يتكلم على بتوع الراب والهيب هوب، هتتكلم امتي على فنك ومجالك وبتوع البوب اللى أنت منهم؟

وأضاف ويجز في الفيديو: "أنت ما تفهمش في الراب حاجة زي ما قولت قبل كدا، فمش هتعرف تعمله، لو لقيت واحد بيعرف يسوق عجلة وأنا مش بعرف فهحترمه، لو حد بيعمل حاجة وأنا مش بعرف أعملها هحترمه، انت مش بتقدر الفنانين دول، انت شايفهم انهم عاوزين يوصلوا في ليفل أنت فيه، في حين أنهم معدينك، انت مش رقم 2 يا رامي، أنت رقم 19، بعيد أوي بجد".

ويجز

زوجة رامي صبري تدخل على خط الخناقة وترد على ويجز: أنت مش على الخريطة

وقالت شيري عادل في بوست لها عبر حسابها بموقع إنستجرام: "ده جزء من الحلقة اللى رامى أتكلم فيها عن الراب، ومن هنا ورايح مش هسكت وهرد على أي حد يفكر يتكلم عنه تانى بأى طريقة مش عجبانى، أولاً رامى اتسأل سؤال فى برنامج ورد وعنده كل الصلاحية لأى رد أو إجابة على أي سؤال يعنى مفيش أي مانع يخلى رامى لما يتسئل سؤال ما يجاوبش".

وأضافت: "ثانيا رامى صبرى ده !!!!!!! يا حضرت فنان من أهم الفنانين فى الوطن العربى ومن أهم الأصوات ده لو حضرتك مش معانا فى مجال المزيكا، وبعدين والله يا ريت رامى عنده الوقت بتاع حضرتك الفاضي أوى بتاع 5 شهور فاضي يا ريت كنا نتمنى".

وتابعت زوجة المطرب رامي صبري: "أما بقى موضوع رامى رقم كام ده هو الحقيقة مش شاغل بال رامى أوى بس لو حضرتك شايف إن رامى رقم 19 مع الأسف الشديد لازم أقول لحضرتك تبقى أنت مش موجود على الخريطة من الأساس".

واختتمت: "أغنية واحدة من رامى صبرى واحدة بس تعمل تاريخ لناس، محتاج تذاكر كويس وتعرف انت بتتكلم عن مين !!!! قبل ما تتكلم لأنك واضح انك عندك شغل تانى غير المزيكا لأنك لو جوا الشغلانة كنت مش هتقول ولا كلمة من الكلام ده علشان الناس متضحكش عليك لأنك اتكلمت عن فنان بجد مش جاى يهزر، وأخيراً لما تحب تعمل دعاية لأغنيتك الجديدة ابعد عن اسم رامى صبرى أنا عارفة إن اسمه ممكن يخلى الأغنية تريند، بس حاول الأغنية بتاعتك الجديدة تعتمد فيها على نفسك".

بوست شيري عادل زوجة رامى صبري