رامي صبرى يعلن انتهاء أزمته مع ويجز: أخويا الصغير وأنا مسامحه

أنهى النجم رامى صبرى أزمته مع مصرب الراب ويجز، وجاء ذلك فى رده على منشور الشاعر تامر حسين  الذى دعم فيه صبرى مشيداً بموهبته ومكانته وسط نجوم الغناء، ليؤكد رامى صبرى على انتهاء الأزمة وأنه سامح ويجز.

رامى صبرى يعلن انتهاء الخلاف مع ويجز

كتب تامر حسين عبر حسابه على فيس بوك موجها حديثه لرامي صبري، "شهادتي فيك مجروحة أنت صوت عبقري مش محتاج رأيي وخطواتك ما شاء الله لطريق النجاح بتكبر وتزيد وكل سنة عندك هيت ناجح ومكسر الدنيا ولسة شايف ترتيب أنغامي أنت رقم ٢ في الاستماع بعد الهضبة ألبوم مكانك وفي الصدارة".

وتابع، "تصريح مش موفق مِن ويجز رغم إن شفت له أكتر من لقاء كان راجل مُثقف ومُهذب جايز يكون واخد على خاطره  أو فِهم كلامك غلط، إنما الأرقام اللى قالها مش أرقامك ولا الطريقة مُناسبة وأنت الكبير يا روما.. ويجز لو يعرف إنت أول واحد باعتلى أغنية البخت وبتقولى الراجل ده عنده حاجه مختلفة  مكنش هيزعل كده دي شهادة حق والله".

ورد رامي صبري على تامر حسين وكتب، "حبيبي تامر حسين الشاعر الكبير العظيم شكرا علي كلامك الجميل اللي زيك.. ويجز أخويا الصغير وأنا مسامحه وحصل خير".

بدأت القصة بظهور المطرب رامي صبري في أحد اللقاءات التليفزيونية ليرد على سؤال من المذيعة عن رأيه فى أغانى المهرجانات والراب، ليرد المطرب بشكل ساخر على أغاني المهرجانات ويصف أغاني الراب وبالتحديد أغاني "ويجز" بأنه مش بيفهم كلماتها، قائلاً "أنا مش بفهم كلامه ولحد دلوقتي مش بفهم، والشباب دي ناجحة من أول ما نزلوا، ولازم الناس تسمع أجيال تانية من الموسيقى".

وسرعان ما حرص مطرب الراب "ويجز"، على الخروج في ستوري عبر حسابه بموقع إنستجرام، ليرد على رامي صبري، وقال: "هتكلم عن فنان فاكر إن عنده صلاحية يتكلم على أي حد والناس تسمع وتسكت، الفنان دا اسمه رامي، رامي كل ما يقعد 4 أو 5 شهور يزهق يطلع يتكلم على بتوع الراب والهيب هوب، هتتكلم امتي على فنك ومجالك وبتوع البوب اللى أنت منهم؟

وأضاف ويجز في الفيديو: "أنت ما تفهمش في الراب حاجة زي ما قولت قبل كدا، فمش هتعرف تعمله، لو لقيت واحد بيعرف يسوق عجلة وأنا مش بعرف فهحترمه، لو حد بيعمل حاجة وأنا مش بعرف أعملها هحترمه، انت مش بتقدر الفنانين دول، انت شايفهم انهم عاوزين يوصلوا في ليفل أنت فيه، في حين أنهم معدينك، انت مش رقم 2 يا رامي، أنت رقم 19، بعيد أوي بجد".

وقالت شيري عادل زوجة رامى صبرى في بوست لها عبر حسابها بموقع إنستجرام: "ده جزء من الحلقة اللى رامى أتكلم فيها عن الراب، ومن هنا ورايح مش هسكت وهرد على أي حد يفكر يتكلم عنه تانى بأى طريقة مش عجبانى، أولاً رامى اتسأل سؤال فى برنامج ورد وعنده كل الصلاحية لأى رد أو إجابة على أي سؤال يعنى مفيش أي مانع يخلى رامى لما يتسئل سؤال ما يجاوبش".

وأضافت: "ثانيا رامى صبرى ده !!!!!!! يا حضرت فنان من أهم الفنانين فى الوطن العربى ومن أهم الأصوات ده لو حضرتك مش معانا فى مجال المزيكا، وبعدين والله يا ريت رامى عنده الوقت بتاع حضرتك الفاضي أوى بتاع 5 شهور فاضي يا ريت كنا نتمنى".

وتابعت زوجة المطرب رامي صبري: "أما بقى موضوع رامى رقم كام ده هو الحقيقة مش شاغل بال رامى أوى بس لو حضرتك شايف إن رامى رقم 19 مع الأسف الشديد لازم أقول لحضرتك تبقى أنت مش موجود على الخريطة من الأساس".

رد زوجة رامى صبرى على ويجز

واختتمت: "أغنية واحدة من رامى صبرى واحدة بس تعمل تاريخ لناس، محتاج تذاكر كويس وتعرف انت بتتكلم عن مين !!!! قبل ما تتكلم لأنك واضح انك عندك شغل تانى غير المزيكا لأنك لو جوا الشغلانة كنت مش هتقول ولا كلمة من الكلام ده علشان الناس متضحكش عليك لأنك اتكلمت عن فنان بجد مش جاى يهزر، وأخيراً لما تحب تعمل دعاية لأغنيتك الجديدة ابعد عن اسم رامى صبرى أنا عارفة إن اسمه ممكن يخلى الأغنية تريند، بس حاول الأغنية بتاعتك الجديدة تعتمد فيها على نفسك".