سناء منصور: كنت أول صوت يسمعه الناس في الإذاعة وكنت السبب الرئيسى في منع أغاني أم كلثوم

قالت الإعلامية سناء منصور، كنت رايحة إذاعة الشرق الأوسط مالياش في الإذاعة، فقط خلفية صحفية، وتدربت هناك على كل حاجة، إزاى أقدم نشرة أو موجز أخبار أو برامج أطفال، وكنت أول صوت يسمعه الناس في الإذاعة، ونسيت أسم الإذاعة، وأنا بقول كلمة افتتاح القناة، دموعى نزلت وقتها، وقولت مش معقول أول يوم لي في الإذاعة يكون أخر يوم، وبدأت رحلة الإذاعة.

وأكدت خلال لقائها ببرنامج مساء دى إم سى مع الإعلامية شيرين عفت، عملت برنامج في رمضان كان مكسر الدنيا، وكان إعداد مفيد فوزى، وكان في مشكلة مع أم كلثوم، وأنا تجاوزت فيها، وأنا بعترف، وكنت وقتها خام بقالى سنتين في الإذاعة بس، ورؤسائى كانوا مبسوطين جدا ، وكنت السبب الرئيسى أن أم كلثوم تمنع أغانيها من الإذاعة، وكنت السبب برضه أنى أكلمها وترجع، وكانت مبسوطة من شوية حاجات عملتها وحلفتلى وحياة الشهر الكريم ده أنا مش مبسوطة باللى بيتعمل فيكم ده.

وتابعت: كنت بقدم ما يطلبه المستمعون، حلقة لنجاة، وحلقة لأم كلثوم، وحلقة لعبد الحليم حافظ، وعبد الحليم كان مؤسسة مش فرد لوحده، وفى مرة كتبلى إهداء للقمر من مداح القمر، وتقريبا استكتر علي القمر، وغيرها، وكتبلى إهداء من مداح القمر للقردة سناء منصور، وعلاقاتى كانت كويسة جدا في الوسط الفني والأدبى .