فزورة أنا مين.. ست قوية وأم الشهيد وياما حكت لنا حواديت بالألف ليلة

يقدم "اليوم السابع" على مدار شهر رمضان فزورة بعنوان "أنا مين"، عن نجم من نجوم زمان عبارة عن معلومات من حياته ومسيرته، وذلك من خلال تليفزيون "اليوم السابع" وسنتلقى إجابتكم على حل الفزورة، التى تذاع يوم الاثنين والأربعاء والجمعة طوال شهر رمضان الجارى.

فزور اليوم فنانة جميلة وست قوية جدا الأم الطفلة وأم الشهيد، من صغرها وهى بتحب التمثيل لكن والدها كان رافض وجودها فى الحياة وما كنش بيحب خلفة البنات، لكن مامتها كان ليها رأى تانى وسميتها عزيزة عشان تعيش وتموت عزيزة، بس خلى بالكم ده اسمها فى البطاقة مش اسم الشهرة بتاعها.

اتجوزت وهى عندها 13 سنة وخلفت ابنها الوحيد اللى من كتر حبها فيه قررت إنها تربط اسمها باسمه، أما بقى تانى جوازة ليها غريبة جدا كانت هى الزوجة التانية ولما ضرتها عرفت قالتلها "أنا بحبه وإنتى بتحبيه ليه ما كسبش أخت ليا ونعيش كلنا فى بيت واحد؟".

دخلت التمثيل وهى عندها 16 سنة في دور كومبارس ولما شافها المخرج مختار عثمان قال "البنت دى سقطت عليا من السما" وكان شرطها عشان تمثل إنها لا تلبس مايوه ولا ترقص.

تقدر تقول عليها جوكر فى التمثيل جارية تلاقى أم وصديقة وجدة حنينة تلاقى.. دى كمان عملت دور أكتر ست شريرة في السينما المصرية لدرجة إنها كانت مغلبة فاطيما وحليمة وكمان كريمة.

فى رمضان بقى سحرتنا بصوتها فى الإذاعة المصرية لمدة 26 سنة عايشين فى حكاياتها وحواديتها.

وهنا عزيزى المشاهد سكتت عن الكلام المباح، وتوتة توتة خلصت الفزورة.