غادة عبد الرازق: نجاح "صيد العقارب" كسر نحس نجاحات كبيرة كنت عاوزة أتجاوزها

أكدت الفنانة غادة عبد الرازق، أنها تشعر بنجاح أي عمل فني أثناء تصويره وقبل عرضه وهي أولى اللحظات من خلال "ريحة العمل" نفسه من خلال سلاسة العمل وكل التفاصيل، قائلة: "من أول اللحظات الأولى من ريحة العمل لما بيكون ماشي سلس وأنا مركزة جداً في كل التفاصيل ومافيش حاجة  هتعدي في العمل غلط  زي ما عايدة بتقول على جثتي أن يطلع فيه حاجه غلط".

تابعت خلال لقائها ببرنامج "كلمة أخيرة"، مع الإعلامية لميس الحديدي، عبر قناة "ON": "في أعمال قدمتها كنت بلاقي العناصر التي حولي ليس لديهم نفس الشغف الذي أملكه وبحاول في اللحظة دي أنقذ ما يمكن إنقاذه لأني ببقى عارفة إن العمل ده مش هيوصل لتقييم 100%، وبحاول أطلع بيه لنسبة 50-55%".
وعن الأعمال التي لم تعجبها في مسيرتها الفنية بعد عرضها، قالت: "فيه أعمال كتيرة بس مقدرش أحددها لأنها مرتبطة بأشخاص أخرين ومش عاوزة اضايقهم بكلامي علشان مايضيقونيش بكلامهم".

وعن تجربة صيد العقارب، قالت: "من أول العمل شعرت إنه سيكون نقلة كبيرة جداً ونجاح مسلسل صيد العقارب كسر نحس نجاحات كبيرة  عليا جداً كنت عاوزة أتجاوزها وده اللي كنت بتمناه لأنه تجاوز سقف النجاحات المحقق  وتحقيق الأفضل كان نحس ولازم أتخطاه بنجاح أكبر".

وعن فكرة الثلاثين حلقة  في صيد العقارب ومقارنتها بتجارب الحلقات القصيرة التي قدمتها قبل رمضان وهل سبب ذلك قلقا لها، قالت: "لم أقلق من فكرة الثلاثين حلقة لأني كنت مخططة وأول مرة أكون مخططة كده إني أعمل مسلسل 15 حلقة  ثم عمل قصير جداً  عبارة عن ثلاث أو خمس حلقات بالكتير ثم العودة لفكرة الثلاثين حلقة وده خططته من البداية أول مرة أنجح في تنفيذ تخطيطي".

وعن تدخلها في تفاصيل العمل في صيد العقارب حتى يخرج العمل بشكل محترف، قالت: "السنة دي بالفعل تدخلت في كل حاجة بشكل محترم  وعمري ما عملت حاجة تضايق حد أو تاخد رصيد من حد كل تدخلاتي كانت لصالح العمل فقط لا غير وليس لغادة عبد الرازق، لأن جميع الفنانين كانوا جايين وحاطين أملهم عليا وكنت شايلة هم كل واحد في المسلسل وأنا كنت مسؤولة عن الجميع  كله كان لازم ينجح وينور في دوره علشان العمل ينجح  كنت شايلة هم كل المشاركين في العمل".