إسعاد يونس: كنت على خط تماس مع حياة وأعمال الزعيم عادل إمام

قالت الفنانة إسعاد يونس أنا تشرفت إنى عرفت عادل إمام من زمان قوى بطريقة غريبة قوى، أنا كنت فى كلية السياحة وكانت الصديقة الأنتيم لمدام هالة زوجة الزعيم معايا فى الفصل، وكنت بشوف هالة أول ما اتخطبت، وأنا وهى كنا حامل فى رامى ونورهان مع بعض.

وأضافت خلال حلقة خاصة بالزعيم عادل إمام على قناة دى أم سى: كنت على خط تماس مع حياة عادل إمام وأعماله كنت معاه فى غاوى مشاكل والمتسول وأمهات فى المنفى وشعبان تحت الصفر ويعقوبيان، وشركتى وزعت أفلامه من أول الإرهاب والكباب ولحد الآخر وأنتجت له فيلم زهايمر.

وتابعت: فى العالم العربى حصل إقبال فظيع على فيلم زهايمر والإقبال كان رائع وأنا بتمناله إنه يكون رايق وجميل ومبسوط، وعارفة دلوقتى إنه عاوز يلعب مع العيال وأنا من أنصار هذا الدور جدا.

وأكدت أن عادل إمام جاد جدا فى أعماله وكل اللى فى فيلم الافوكاتوا كنا مستغربين ازاى هو ماسك الشخصية دى، وهو ولا كان بيهزر ولا راح ناحية الافيهات، ولم يكن متجهم فى الاستوديو، وكان ينعم بالزملاء القدام ويستمتع بالنجوم الجدد، ويحب قوى يكتشفهم، عادل إمام صاحب فضل وجابنى فى شعبان تحت الصفر وقاللى انا عند وعدى ولا لأ وانا كنت نسيت وعمرى ما هنسهاله، وهو من اشد حساباته البيت ويكون بيت هادئ ومشجع ليه وست تكون مقدرة لظروف شغله وتربية الأولاد لازم تكون ايه وان، وهالة ست واعية ومثقفة وعارفة قيمة زوجها وهى عنصر مهم جدا فى حياته.

وتابعت: عادل إمام عارف انى بحبه وأنا بحبه بعدد الايام اللى عرفنا فيها بعض وعدد المغامرات اللى عملناها وانا ما جيش حاجة فى سعيد وصلاح وسمير خفاجة لكن كان ليا حاجة على جنب هو عارف انى بحبه وبقدره وبينا وبين بعض حاجات رائعة وهو عارف انا بحبه قد ايه واتمناله راحة البال.

يحتفل الزعيم عادل إمام اليوم الجمعة 17 مايو بعيد ميلاده الـ84، فهو من مواليد 17 مايو عام 1940، وهو زعيم الفن الذى بدأ مسيرته عندما كان طالبًا والتحق بفرقة التليفزيون المسرحية عام 1962.

وجسد العديد من الأدوار التى تمس الشعب، وتناقش العديد من القضايا المهمة للمجتمع، فعند تجسيد دوره فى فيلم "زهايمر" نقاش العديد من الجوانب كالمرض وتأثيره على المصاب، والتعامل مع جشع الأبناء، وفى فيلم "النمر والأنثى" ناقش تأثير المدمن على المحيطين به وعلى نفسه، وفى فيلم "خلى بالك من عقلك" ناقش دور التعامل مع المريض العقلى وذلك خلال تعامله مع الفنانة شيرهان التى كانت تعانى من مرض عقلى.