"سارة" تصمم إكسسوارات وتتجول لبيعها.. من شماعة غسيل لعجلة بمعرض الزهور

أحيانًا يظل الإنسان يعمل بمهنة ما لسنوات طويلة لكنه في لحظة ما يشعر بالملل وفقدان شغف الاستمرار فيها ويضطر للبحث عن مهنة أخرى يجد فيها شغفه ويحقق بها طموحه ويثبت ذاته أمام الجميع وهذا ما فعلته سارة سيد صاحبة الـ30 عاما والحاصلة على دبلوم زراعة والتي اكتشفت بعد عملها لمدة 14 عامًا في عدد من المجالات مثل التسويق والسكرتارية بأنها تتمتع بموهبة تصميم الإكسسوارات، وتعرض تصميماتها على المارة بالتجول بدراجة بمعرض الزهور المقام بالمتحف الزراعي.

سارة بتعرض تصميماتها على عجلة بمعرض الزهور

اتجهت سارة سيد إلى تصميم الإكسسوارات منذ 7 سنوات وتحدثت عن بداية رحلتها مع تصميمات "الهاند ميد"، قائلة:" بدأت الأول أصمم إكسسوارات كهدايا لإخواتى وأصحابى لحد مافكرت أحول الموضوع لحرفة أكسب منها".

أمنت سارة بموهبتها في تصميم الإكسسوارات وبدأت تعلم وتتطور من نفسها، ثم تشجعت وجمعت أول إنتاجها لتطرحه على المارة بالشارع، بمختلف الوسائل الممكنة، حيث قالت :"بدأت أعرض إكسسواراتى بتعليقها على شماعة الغسيل وكنت بلف عليها الإكسسوارات والبس على إيدى الحظاظات وأمشى بيها في الشارع عشان أعرضها على الناس وبعد كده بقيت أمسك استاندات وبعد فترة اشتريت عجلة واخواتى نصحونى ألف بيها في الشارع وأعرض منتجاتى عليها وكنت الأول خايفة من الطريق والناس لكن لقيتها فكرة حلوة وراحة ليا ومن سنتين عملت صندوق صغير وعرضت عليه منتجاتى".

تابعت: "واحدة واحدة بدأت اتنقل من مكان لمكان وعملت براند لنفسى والناس بقيت تعرفنى واللى بيساعدنى على الاستمرار ده كله أخواتى اللى ساعدونى كتير وأدونى أفكار ".

وعن أفكار تصميمات الإكسسوارات قالت: "بصمم كل أشكال الإكسسوارات من عقد وحلق وخواتم وخلخال والأفكار من خيالى وأحياناً بحب بستوحى أفكارى من مواقع أجنبية وأجدد فيها ".

تواجه سارة خلال تجولها بدراجتها في الشوارع لعرض إكسسواراتها على المارة العديد من الصعوبات التي تحدثت عنها قائلة:" الصعوبات اللى بتقابلنى في الشغل هو عرضه في الشارع لأن فيه ناس كتير لسه مش مقتنعة بأن فيه بنت نازلة تشقى لدرجة وبتعرض لمضايقات لدرجة إنى مش عارفة استقر في مكان أقف فيه من غير مشاكل".

تحلم سارة بالشهرة العالمية وتحقيقها في القريب العاجل، حيث قالت :"بتمنى يكون ليا مكان وأكون براند حقيقى لأنى عايزة أبقى زى أى ماركة عالمية معروفة والكل يعرف شغلى مجرد ما يشوفوه".

سارة بجوار دراجتها

سارة تبيع للمارة

سارة بمعرض الزهور

سارة مصممة إكسسوارات

إكسسوارات سارة

تصميم سارة سيد