من الحضارة للتطوير: كيف تخطط مصر لتصبح الوجهة السياحية الأولى عالميًا؟

في حاجات في الدنيا ممكن تشتغل عليها وتغيرها، زي البنية التحتية أو التكنولوجيا، وفي حاجات تانية بتكون هبة من ربنا، مش ممكن حد يخلقها أو يغيرها. موقعك الجغرافي، تاريخك العريق، وآثارك اللي بتحكي قصة حضارة عظيمة، كل دي نعم ربنا خص بيها بلدنا،

دي مش مجرد إمكانيات، دي كنوز لازم نقدرها ونشتغل عليها علشان نحافظ عليها ونكبر منافعها.
وده بالظبط اللي مصر بتعمله ومركزين جدا عليه الايام ديه. مش بس بنحافظ على النعم اللي عندنا، لكن كمان بنطورها ونشتغل على تقديمها للعالم بشكل أفضل.
لأن الحفاظ على النعم اللي ربنا وهبها لنا مش بس مسؤولية، لكنه أمانة بنسلمها للأجيال الجاية.

مصر بلد الحضارة والتاريخ، اللي العالم كله بيعترف بإنها واحدة من أكتر الدول الغنية بمقومات سياحية مفيش زيها في أي حتة. ومع كل التحديات اللي حوالينا، إحنا مش بس بنحافظ على اللي عندنا، لكن بنشتغل على تطوير وتحسين كل حاجة عشان نبقى وجهة سياحية عالمية من الطراز الأول وعلشان كده

الدكتور مصطفى مدبولي، رئيس الوزراء، اجتمع مع مجموعة من الوزراء والمسؤولين عشان يناقشوا إزاي يسهّلوا دخول السائحين للمطارات المصرية، ويخلوا تجربة السائح في مصر مميزة من أول لحظة وصوله. الهدف الأساسي كان تحسين تجربة السائح ودعم السياحة كواحد من الأعمدة الأساسية اللي بتقوم عليها اقتصاد بلدنا.
إيه اللي اتكلموا فيه في الاجتماع؟

1. تسهيل دخول السائحين:
الدكتور مدبولي أكد على أهمية تقديم تجربة ممتعة وسهلة لأي سائح يدخل البلد، وإن الإجراءات تكون بسيطة وسريعة.
شدد كمان على ضرورة استخدام أحدث التكنولوجيا العالمية عشان تسهيل دخول وخروج السائحين.
2. تطوير المنصات الإلكترونية:
الاجتماع ركز على تحسين منصة التأشيرات الإلكترونية بحيث السائح يقدر يخلص إجراءاته وهو لسه بره البلد، وده هيقلل الزحمة ويسرّع كل حاجة.
وزير الاتصالات أشار إن لازم نصلح أي مشاكل كانت موجودة في النظام القديم، ونواكب أحدث التقنيات.

3. دور السفارات والقنصليات:
وزير الخارجية وضّح إن السفارات والقنصليات شغالة بقوة لتسهيل التأشيرات للسائحين في الخارج، لكن لازم كمان نضمن سهولة الإجراءات عند وصولهم للمطارات.

4. تحسين المطارات:
وزير الطيران المدني أكد على أهمية تجهيز المطارات بأحدث النظم لتجنب التكدس والزحمة، وخصوصًا مع التوسع في خدمات التأشيرات الإلكترونية.

5. الخطط المستقبلية:
رئيس الوزراء كلف وزارتي السياحة والطيران بإعداد خطة متكاملة تشمل تحديث البنية التحتية للمطارات وتحسين كل الخدمات اللي بتخص السائحين.

لازم نكون على علم ان التصنيف العالمي لمصر برغم كل الظروف الإقليمية والصعوبات، مصر لسه محافظة على مكانتها كواحدة من أفضل 25 وجهة سياحية في العالم، وده شهادة على قوة قطاع السياحة عندنا وقدرته على الصمود.
مصر عندها اللى مش عند حد زى:

* التاريخ اللي مفيش زيه:  عندنا تلت آثار العالم، من أهرامات الجيزة اللي هي واحدة من عجايب الدنيا السبع، لمعبد الكرنك ووادي الملوك في الأقصر وأسوان، غير كنوز الفراعنة اللي بتعرضها المتحف المصري الكبير، اللي هيبقى أكبر متحف أثري في العالم لما يفتح أبوابه بشكل كامل.

* السواحل والشواطئ : البحر الأحمر بميته الصافية وشُعبه المرجانية، والبحر المتوسط بشواطئه اللي تنافس أجمل الشواطئ الأوروبية. عندنا أكتر من 2000  كيلومتر سواحل تخليك تحس إنك في أغضل مكان فى العالم.

خطوات مصر لتطوير السياحة:

مصر مش واقفة على اللي عندها، بالعكس، شغالة على مشاريع ضخمة عشان ترفع مستوى السياحة وتقدم تجربة مختلفة لأي سائح يزور البلد.

مشاريع عملاقة:

1. المتحف المصري الكبير:
أكبر مشروع متحفي في العالم، واللي هيكون مركز رئيسي لجذب السياح من كل أنحاء العالم.

2. المدن الجديدة من الجيل الرابع:
* العاصمة الإدارية الجديدة: مدينة متطورة بمركز مالي عالمي ومنطقة الأعمال المركزية.
* العلمين الجديدة: وجهة سياحية متكاملة بشواطئ عالمية ومنتجعات راقية.
* الجلالة: مدينة على جبال البحر الأحمر، بتقدم تجربة سياحية مختلفة.

3. تطوير المطارات:
* مطارات جديدة زي مطار العاصمة ومطار سفنكس، ومطارات بتتطور عشان تستقبل أعداد أكبر من السائحين زي مطار شرم الشيخ والغردقة.

4. تحسين وسائل المواصلات:
* مشاريع زي القطار الكهربائي السريع اللي هيربط المدن ببعض، وتطوير الطرق عشان يبقى التنقل بين الأماكن السياحية أسهل وأسرع.

التكنولوجيا في السياحة:

التأشيرة الإلكترونية:
* دلوقتي أي سائح يقدر يقدم على تأشيرته من غير ما يضطر يروح السفارة، وكل ده بيتم في وقت قياسي.

إحصائيات وأرقام تبعث على التفاؤل:

* عدد السائحين : مصر استقبلت حوالي 15.7 مليون سائح في 2024، رقم قياسي يثبت إننا ماشيين في الاتجاه الصح.

* إيرادات السياحة: وصلت الإيرادات لحوالي 14.4 مليار دولار السنة دي، وده بزيادة ملحوظة عن السنة اللي فاتت.

* متوسط إنفاق السائح: السائح بيصرف حوالي 100 دولار يومياً، ولو ركزنا أكتر على تحسين الخدمات، الرقم ده ممكن يزيد بسهولة.

مصر وسط كل التحديات!

لو دي أرقامنا وإحنا في ظل ظروف صعبة، تخيل لما الدنيا حوالينا تهدى. مصر اللي بتستقبل ملايين السياح كل سنة، ممكن تضاعف الأعداد وتكسر أرقام جديدة. ده مش حلم، ده واقع ممكن يحصل لما نكمل شغلنا على تطوير البنية التحتية، تحسين الخدمات، وتسويق بلدنا بشكل أفضل.

* الأهداف المستقبلية:
30مليون سائح سنوياً خلال كام سنة جاية.
إيرادات تصل لـ 25 مليار دولار سنوياً مع تحسين التجربة السياحية.

رسالة أمل: مصر مش بس بتقدم سياحة، مصر بتقدم تجربة حياة، بتحكي قصة حضارة، وبتدي العالم فرصة يعيش سحر الماضي والحاضر. ومع كل اللي بنعمله، مصر هتبقى مش بس وجهة سياحية، هتبقى حلم لكل واحد في العالم عايز يكتشف الجمال الحقيقي.
مصر عظيمة، ودايمًا هتفضل عظيمة، ومستقبلنا السياحي مشرق أكتر مما نتخيل.