باسم يوسف: نكتة ركبتنى لقاء بيرس مورجان وتشبيهاتى كسرت سرديات إسرائيل

قال الإعلامي باسم يوسف، إنه ظهر مع الإعلامي الأمريكي بيرس مورجان، يوم 18 أكتوبر 2023، بعد 11 يوم من السابع من أكتوبر.

وأضاف خلال فقرته ببرنامج كلمة أخيرة الذي يذاع على قناة on: ساعتها مكانش عندي أي رد لكل الأكاذيب اللي كانت بتطلع، والإعلام الغربي كان مجيش في كل مكان، وأنا فاكر في لوس أنجلوس وقتها، حطوا الأعلام الإسرائيلية في كل حتة وكنت حاسس أني ماشي في تل أبيب، ومش عارف هطلع أدافع عن ايه؟

وتابع الإعلامى باسم يوسف: أنا دخلت للقاء ده، كأني داخل عرض استاند اب كوميدي، لأني في عالم الحقيقة فيه بتتشوه قصاد عنيك، لا وجود للمنطق، والحاجة الوحيدة اللي تنفع في العبث ده، هو مزيد من العبث.

وقال باسم يوسف: أنا حضرت ماتريال وكتبتها كأني بكتب استاند اب كوميدي، وفي أي عرض استاند اب كوميدي في حاجة اسمها النكتة الافتتاحية، وده اللي بيفك الجمهور والجو، وبتسهل عليك انك تركب العرض وتتحكم فيه، وساعتها كل الناس بتتكلم عن ان في دروع بشرية لتبرير قتل المدنيين.

وأضاف: أول ما دخلت اللقاء، قولت ان مراتي كانت مستخبية ورا دروع بشرية، وهو لما سمع الإجابة ارتبك، وهنا أنا ركبت الحوار.

وأوضح: مع كل نقطة رد على السردية اللي كان الاحتلال بيضحك به على الناس، كانت السردية دي بتنهار، أنا مكنتش بتكلم كسياسي أو محلل، أنا كنت بتكلم كرجل شارع عادي  بيقولهم ايه الهبل اللي انتوا فيه ده.

وقال: أنا كنت داخل مش ضامن أي حاجة، وكان ممكن واحدة من الأساليب اللي بتكلم عليها دلوقتي وانا بستخدمها تفرقع في وشي، والموضوع كان كله مراهنة على كل حاجة، وأنا حاولت اعمل حاجة بيعملها كوميدانات كتير.

وأضاف: انا حاولت أتكلم عن السياسية وبستخدم تعبيرات تافهة بتلمس مع الناس وحياتهم اليومية، يعني مثلا لما قارنت إسرائيل بهوم لاندر، وهو شخصية عكس سوبر مان، وده تعبير إن إسرائيل بتضحك على الناس، ولما دخلت العلاقات التوكسيك في الموضوع، هنا كل قلب كسير وذكرى سيئة وتروما من علاقة سامة كان لها تأثير، ومكنتش أعرف أن الكوكب كله عنده مشاكل نفسية.