مذيعات برنامج الستات مايعرفوش يكدبوا يقدمن علامات تكشف الشخص الجدير بثقتك

في حلقة من برنامج "الستات مايعرفوش يكدبوا"، ناقشت الإعلاميتان إيمان عز الدين ومنى عبد الغني موضوع "الثقة" في العلاقات الاجتماعية، مؤكدتين أنها ليست مجرد كلام، بل مواقف وأفعال تظهر مع الأزمات والوقت.

وقدمت الإعلامية إيمان عز الدين مجموعة من العلامات التي تدل على أن الشخص الذي أمامك جدير بالثقة، قائلة: "لو عايز تعرف إن الشخص اللي قدامك ده يستحق فعلًا ثقتك فيه ولا لأ، ركز في اللي هقولك عليه".

علامات الشخص الجدير بالثقة: الشعور بالراحة في الحديث، وأوضحت إيمان: "بتحس بالراحة وأنت بتتكلم على طبيعتك مع هذا الشخص، يعني أنت مش مضطر طول الوقت إنك تتجمل أو تمثل أو تخبي حاجة عشان خايف إنه يحكم عليك، أو يتهمك، أو ياخد منك معلومة ممكن يستغلها ضدك. بتبقى على راحتك معاه ومطمن إنه مش هيستغل كلامك ده"، واحترام الحدود والخصوصية، وتابعت: "الشخص ده بيحترم حدودك، يعني ما بيضغطش عليك ولا بيتدخل في خصوصياتك، وبيعرف إمتى يقف عند حده عشان هو بيحترمك"، وأشارت إيمان إلى أن الشخص الجدير بالثقة "عنده تعاطف، يعني بيحس بيك وقت الشدة من غير ما تتكلم، مش بيقلب الموقف عليك ويقلب الترابيزة عليك أو حتى إنه يسخر من إحساسك ويقلل منه بمنطق.. يا عم أنت مكبر الموضوع أوي، يا عم أنت أحسن من غيرك، أنت أوفر أوي، إيه الدراما اللي أنت عاملها دي! ما بيسخرش منك ولا من مشاعرك، بالعكس بيتعاطف معاك، ومش بس تعاطف بالكلام، لأ ده بيحاول يقف جنبك بشكل حقيقي وإيجابي".

من جانبها، أضافت الإعلامية منى عبد الغني نقاطًا أخرى لاستكمال الصورة، قائلة: احترام الغائبين: قالت عبد الغني: "شوف طريقة اللي قدامك في الكلام عن الناس، اللي بيحترم الناس الغايبين أكيد هيحترمك، واللي بيغتاب غيرك هييجي يوم يتكلم عليك في ضهرك ومش هيحترم غيابك".

وأضافت أن الشخص "سليط اللسان" الذي يغتاب الآخرين بسهولة "لا تثق فيه أبدًا"، وتطابق الأقوال مع الأفعال، وأكدت عبد الغني أن "كلامه لازم يكون زي أفعاله، مش كلام وبس"، مشيرةً إلى ضرورة أن يوفي الشخص بوعده، واستشهدت بصفات المنافق "إذا وعد أخلف، وإذا خاصم فجر، وإذا اؤتمن خان، وإذا تكلم كذب"، والثقة المتبادلة، وأوضحت إيمان عز الدين أن العلاقة يجب أن تكون فيها ثقة متبادلة، فلا يصح أن تثق في شخص وتخبره بأسرارك بينما هو "مكرتن ومأمن وخايف يحكيلك أي حاجة".

وأضافت: "أي علاقة سوية فيها رايح جاي".، والاعتراف بالخطأ: واختتمت إيمان عز الدين: "اللي بيغلط، منتهى القوة إنه يعترف بغلطه"، موضحة أن الشخص الذي لا يحاول تزييف الحقائق أو إلقاء اللوم على غيره ليظهر أنه لا يخطئ، بل يقول "أنا غلطت في حقك، أنا آسف"، هو إنسان "واعي ومدرك وناضج ومحترم وحريص على اللي قدامه".

وفيما يتعلق بإمكانية عودة الثقة بعد فقدانها، أكدت إيمان عز الدين أن "الثقة لو راحت ما بترجعش تاني أبدًا"، بينما رأت منى عبد الغني أن عودتها ممكنة "بس عايزة شغل ومجهود"، خاصة في الأخطاء البسيطة، وإلا "البيوت هتخرب والناس كلها هتسيب بعض".