المتحف المصرى الكبير.. مصمم عروض الألعاب النارية يكشف تفاصيل حفل الافتتاح.. ويؤكد: أهم وأكبر محطة فى مسيرتى الفنية.. اشتغلنا شهور لكى نبهر العالم.. واختيار الألوان والتصميمات عبرت عن الحضارة المصرية.. فيديو

أكد الفنان أحمد عصام، مصمم عروض الألعاب النارية، أن مشاركته في الافتتاح الرسمي للمتحف المصري الكبير كانت واحدة من أهم وأكبر المحطات في مسيرته الفنية، موضحًا أن التحضير للعرض استغرق شهورًا طويلة من العمل والدراسة الدقيقة لكل تفصيلة في الحدث.

وقال عصام خلال لقائه مع اليوم السابع: "كان لي الشرف أن أكون جزءا من هذا الحدث العالمي، ومسؤولا عن عروض الألعاب النارية اللي اتفرج عليه العالم كله. اشتغلنا عليه كتير جدًا، وافتتاح المتحف اتأجل مرتين قبل كده، وده ادانا فرصة نذاكر أكتر ونطلع بحاجة تبسط الناس وتبهِر العالم."

وأضاف أن أكبر نعمة أن يعمل الإنسان في مجال يحبه، قائلًا: "أنا بحب شغلي جدًا، وبلفّ العالم كله عشان أتعلم أي فكرة جديدة. الحمد لله إن ربنا اداني الفرصة أشتغل في حاجة بحبها، وده اللي بيخليني أديها كل وقتي ومجهودي."

وعن التحضيرات الخاصة بعروض الافتتاح، أوضح أنه لا يوجد عرض يشبه الآخر، لأن كل حدث له طبيعته الخاصة، مضيفًا: "أنا دايمًا بذاكر الحدث اللي بشتغل عليه. افتتاح المتحف المصري الكبير كان مختلف، لأنه حدث عظيم بيتفرج عليه العالم كله، فكان لازم نشتغل بدقة ونختار الألوان والتصميمات اللي تعبر عن الحضارة المصرية وفي نفس الوقت تبقى مبهجة."

وأشار إلى أن العمل الذي شاهده الجمهور لم يكن مجهود فرد واحد، بل ثمرة جهد فريق كبير، قائلًا: "اللي شفتوه النهاردة ده نتاج شغل فريق ضخم فيه أكتر من 150 شخص، كلهم بيحبوا شغلهم وبيحبوا مصر. من أول أخويا محمد وكل الفريق اللي اشتغل معانا لحد آخر فرد، كلهم تعبوا عشان اللحظة دي تطلع بالشكل اللي شافه العالم."

وختم عصام حديثه قائلًا: "افتتاح المتحف المصري الكبير حدث استثنائي، ووجود الرئيس عبد الفتاح السيسي وقادة العالم أعطاه قيمة أكبر. الحمد لله إننا قدرنا نقدم حاجة تليق بمصر، وتثبت إن بلدنا دايمًا قادرة تبهر العالم".