زينة: أحب المخرج يوجهنى ومستعدة أعيد المشهد مليون مرة

زينة

كتب محمد زكريا

الأربعاء، 03 ديسمبر 2025 06:00 م

تحدثت النجمة زينة عن عملها مع العديد من المخرجين خلال مشوارها الفنى، خاصة الذين تألقت معهم وقدمت آداء لافتا.

وقالت زينة خلال ندوة تكريمها باليوم السابع: "أنا بالنسبة لى أى صعوبة فنية فوق دماغى، لو المخرج طلب أعيد المشهد 600 مليون مرة أنا تحت أمره، أعمل أى حاجة لها علاقة بالفن والإتقان، ما عدا الضرب طبعاً! عاوزين نعمل ضرب احترافى مفيش مشكلة".

زينة: أحب المخرج يوجهني واستفيد منه

وتابعت زينة: "أنا بطبيعتى بحب أستفيد من المخرج، أحب أسمع توجيهه، أحب يمشّينى، علشان كده بتلاقونى مختلفة من عمل للتانى، أنا بشتغل بناء على رؤية المخرج: هنا عايزنى إزاى؟ وهنا طلعنى إزاى؟ ولو اتساب لى كل شىء ممكن أعمل حاجات مش مناسبة، لكن فى الآخر أنا بني آدم، فلازم يكون فيه مخرج ماسك زمام الأمور".

زينة تتحدث عن العمل مع هاني خليفة

وتطرقت زينة لعملها مع المخرج هانى خليفة قائلة: "بصراحة أنا كنت مستمتعة جدا بالشغل مع الأستاذ هانى خليفة، رغم إن الناس قالولى إنه صعب، لكن أنا ما شفتش ده إطلاقاً، شفت إنسان مكرّس حياته للشغل، ممكن يتعب نفسه لحد الموت عشان يطلع الشغل بأحسن شكل، وأهم أدواته هي الممثل، ودى حاجة تتحط فوق الرأس، وأنا فاكرة إنه قال لى إن ناس كتير كانت بتكلمه: إزاى هتشتغل مع زينة؟ كأن زينة دي بتعض!".

محمد أمين: المخرج الملاك

واستكملت زينة: "أما الأستاذ محمد أمين، ده بالنسبالى الملاك، لما يحب يوجّهني بحاجة، ييجي لغاية ودنى ويقولها بهدوء واحترام، هو إنسان حساس، فنان، محترم، مهذب، وتركيبته مختلفة عن البيئة اللى أحنا عايشين فيها، غير إنه موهوب وشاطر وحسّاس، والشغل معاه ممتع فى كل لحظة، أنا عملت معاه فيلمين، وكانت من أجمل الأوقات، كنت بروح التصوير طول الوقت خايفة، خايفة ماعملش اللى هو عايزه، خايفة أغلط، خايفة ما أديلوش الأداء اللى بيفكر فيه".

زينة: البعض لا يريد لى النجاح

عن سبب السمعة التي تُنقل عنها للمخرجين قالت: "والله ما أعرف، ممكن مش عاوزين تقوملى قومة! والحقيقة، ده بيحصلى كتير، وفى الغالب مش غيرة بس، لأ، ده خوف إن زينة تشتغل مع مخرج كبير وتنجح، فيقولوا يا نهار أسود! هتنجح بقى مع هاني خليفة!طب ليه؟".

وشددت زينة على أنها لا يمكن أن تقوم بمثل هذا التصرف، قائلة:" أنا عمرى ما اتصل بمخرج وأقوله إزاى تشتغل مع فلانة؟ ما ينفعش، بس دا بيحصل كتير معايا، لكن ما ينفعش أنا أعمل كده".

اليوم السابع يُكرّم زينة

وكرّم اليوم السابع النجمة زينة عن دورها المميز في مسلسل ورد وشوكولاتة، الذي حقق نجاحاً كبيراً خلال الأسابيع الماضية، حيث تألقت زينة في تجسيد شخصية "مروة"، ونالت إعجاب الجمهور والنقاد على حد سواء، بفضل أدائها القوي والمشاهد المؤثرة التي قدمتها، سواء في لحظات الانفعال أو في المشاهد الإنسانية العميقة التي أضفت عليها طابعاً مميزاً.