حب تحدى اختلاف الثقافات واللغات.."مصطفى وماريا" حب وزواج رغم أنف حرب روسيا وأوكرانيا.. قصة إسراء وزوجها "وان- يو".. بالنكهة المصرية الصينية.. اللغة العربية سبب تعارف سلمى وزوجها الهندى إبراهيم

يبحث الإنسان طوال الوقت عن شريك حياة يتوافق معه في الكثير من صفاته الشخصية حتى يستطيع التفاهم معه ويتجنب في المستقبل حدوث أي خلافات بينهما، لكن القلب قد يكون له رأى آخر، فقد يتعلق بشخص مختلف في العادات والتقاليد واللغة والبلد، ويدفعه الحب لمحاربة كل العوائق التي تحول بينه وبين حبيبه، حتى ينتصران في النهاية ويكونان أسرة مستقرة سعيدة ليثبتان لمن حولهما بأن حبهما قادر على تخطى ما يعتبره البعض حواجز تحول بين المرء وسعادته .

وفى يوم عيد الحب أو الفلانتين، التقى "اليوم السابع"، بأمثلة كثيرة من المصريون الذين تزوجوا من أجانب ورغم اختلاف العادات والتقاليد إلا إنهما استطاعوا أن يكونوا أسرة صغيرة سعيدة يضرب بها المثل في السعادة الزوجية، مثل :

مصطفى و ماريا بيجيفتس.. صداقة على "الفيس بوك" تحولت لقصة حب وزواج
 

بدأت قصة حب مصطفى حامد الذى يعمل مهندس ميكانيكا في السعودية والأوكرانية ماريا بيجيفتس والتي كانت تعمل مديرة بإحدى الشركات المتخصصة في مجال المعامل الطبية من خلال صداقتهما على موقع " الفيس بوك"، برغم اختلاف العادات والتقاليد بينهما إلا إن شرارة الحب ولدت بينهما و تحدث مصطفى عن قصة حبه لماريا، لـ" اليوم السابع"، حيث قال :" اتعرفنا علي بعض عن طريق "الفيس بوك" وفي خلال 4 شهور اتكلمنا تليفونياً ومكالمات فيديو، ومع الوقت فهمنا بعض وبالطبع اتكلمنا عن أحلامنا وطموحتنا وإيه اللى بنحبه وبنكره وعن مواصفات شريك الحياة اللى بنتمناها، ودعوتها لزياتي في القاهرة عشان أفرجها على الأماكن السياحية والعادات والتقاليد المصرية ومع الوقت علاقتنا أتوطدت أكتر و ده كان في  شهر سبتمبر 2021،  وبعد ما شوفتها و خرجنا مع بعض و فهمنا بعض اكتر اعترفت لها بحبي ليها من أول اسبوع وكانت مبسوطة جداً وبعد كده سافرت لكييف".

مصطفى وزوجته ماريا

وتابع مصطفى :"بعد فترة قصيرة دعتني للاحتفال بالسنة الميلادية الجديدة في اوكرانيا عشان أتعرف علي عائلتها و تفرجنى على المعالم السياحية في كييف و بعض المسارح و المتاحف و أقابل عائلتها، لكن محاولتنا باءت بالفشل نتيجة لرفض السفارة الأوكرانية للفيزا الخاصة بيا".

مصطفى وماريا بعد زواجهما

ويكمل "وبعد كده دعوت ماريا في 2 يناير واتممنا الزواج في 4 يناير و بعدها عملنا احتفال رومانسي خاص بيا أنا وهي يوم 7 يناير علي مركب شراعي في النيل وبعد كده عملنا احتفال صغير في كافيه بحضور الأقارب و الأصدقاء".

مصطفى وماريا

ومثل كل قصة حب قد تواجه بعض العوائق والصعوبات وهذا ما حدث مع مصطفى وماريا، حيث قال الزوج:" واجهت إعتراض من والدي ووالدتي  لأن زوجتي غير عربية وغير مسلمة ومطلقة، ولكن صممت على ماريا وقدرت أقنعهم إنها تصلح تكون شريكة حياتى بسبب شعورى بالراحة معاها وكمان إننا متفاهمين، ومع الوقت أهلى تقبله الموضوع وحبوا ماريا جداً بعد ماعرفوها وعرفوا قد إيه هي بتحبنى ومخلصة ليا، ومن ناحية أهل ماريا كانت والدتها و أقاربها وأصدقائها كمان مرحبين جداً بعلاقتنا ولكنهم اندهشوا بسرعه قرار الزواج والصدمه الثانية إنها أعلنت إسلامها في الأزهر الشريف بعد قدومها إلي القاهرة و ده فى شهر ابريل 2022.".

حب رغم أنف الحرب
 

وتابع :"بعد الزواج رجعت ماريا لأوكرانيا عشان شغلها و كان إتفاقنا إننا نشوف بعض من وقت للتاني سواء أسافر لها أوكرانيا أوهي تسافر لى القاهرة أو السعودية، ولكن وقعت حرب روسيا وأوكرانيا في شهر فبراير 2022 ، ومقدرتش ماريا تغادر أوكرانيا إلا في مارس وكانت بتجد صعوبة بسبب والدتها المسنة واستطعت بتوفيق من الله و بجهود الأصدقاء و الأحباء نساعدها ترافق وفد أرسلته السفارة المصرية في أوكرانيا لنقل الطلبة المصريين من كييف إلي بولندا، وفي أخر الساعات أجهدت ماريا ولم تستطع قيادة السيارة ونسقت مع الوفد المصري و مع الشباب الطلبة بقيادة سيارة ماريا مع والدتها مع متابعتها والإطمئنان علي صحتها طوال هذه الفتره، لحد ماوصلت لبولندا ثم إلى مطار القاهرة" .

الاتفاق على تربية الأطفال على الثقافتين
 

وعن تربية الأطفال، قال مصطفى :"لم يرزقنا الله حتى الأن بأطفال، لكن أتفقت مع ماريا على تربيتهم على الديانة الإسلامية مع مزج الثقافة المصرية و الأوكرانية بما لا يتعارض مع الدين الإسلامي".

وعن طريقة التفاهم بين مصطفى وزوجته، قال :"بنتعامل مع بعض باللغة الإنجليزية وبتتحاول تتعلم عربى ولهجة مصرية وبنحلم أننا نعلم ولادنا اللغة الإنجليزية والأوكرانية والعربية وطريقة التفاهم بينا كانت بسيطة، من طرفي كنت أرحب بكل ما هو جيد في الثقافه الأوكرانية من حيث عادات الطعام و العلاقات الإجتماعية و الإحتفال بالأعياد الرسمية ومن ناحيتها كانت مرحبة بكل ما هو جيد في عاداتنا من حيث الملابس و الطعام و الاحتفال بالأعياد و المناسبات المصرية مع احترام ان يكون المرجع الأول لنا هو الدين الإسلامي ".

وتابع :"أعجبت ماريا باعتناء الرجل المصري ببيته وتكفله بكافة مصاريف الأسره لأن فى الثقافة الأوكرانية الرجل والمرأة بيشتغلوا ويتشاركوا في الأعباء المادية إلى جانب إهتمام الزوجة بمنزلها كمان 90% من العائلات في أوكرانيا لا يهتم الرجل فيها بتربية أطفاله، ومن ناحيتي أعجبت بطريقة ماريا في التعامل معايا، وطبعا هى بتتكلم 4 لغات وهي الأوكرانية والروسية و الإنجليزية و التشيكيية،. وطباخة ماهرة جداً إلي جانب إنها بتهتم ببيتها  ولما بيحصل خلاف بينا بتستنى لما اهدىء وتتكلم معايا، اعتقد أن ماريا هي مزيج ما بين أمال زايد في دور أمينة بفيلم بين القصرين من حيث طاعه زوجها و الإهتمام بالبيت و ما بين سعاد حسني في اهتمامها بمظهرها و شخصيتها الجميلة المبتسمة دائما الخفيفة علي العين و القلب.

بيت في مكان هادىء
 

وعبر مصطفى عن حلمه الذى يتمنى تحقيقه مع ماريا، حيث قال :" بتمنى أعمل شركة خاصة في مجال عزل الحرارة و الصوت للمقاولات و الاستشارات الهندسية و بعد مانعجز أعيش أنا وهى في مكان هادئ سواء في مدينة العبور أو في منطقه جبال كرباثين غرب جبال الكاربات بأوكرانيا وبتتميز بالمناظر الطبيعية الجميلة و الأنهار و السهول و الغابات".

قصة حب إسراء وزوجها "وان- يو"..بطعم النكهة المصرية الصينية
 

وتحدثت إسراء صابر خريجة كلية الألسن قسم اللغة الصينية، وتعمل مترجمة بإحدى الشركات المتخصصة بترجمة المسلسلات الصينى، عن قصة حبها مع زوجها الصينى "وان- يو" أو سعد كما يعرف بالعربى، حيث قالت :" جوزى صيني مسلم، وعايش فى مصر هو وأهله من التسعينات، عشان كده بيعرف يتكلم عربى كويس، وهو كمان شغال في الترجمة واتعرفنا على بعض في الشغل، وطلب يتقدم لخطبتى ووافقت وجوازنا تم حسب العادات والتقاليد المصرية من حيث المهر والشبكة وقائمة المنقولات،  واشترى شقة هنا في مصر".

إسراء وزوجها سعد

إختفاء الصعوبات في زواج إسراء ووان - يو
 

وتابعت إسراء :" أهلى الأول كانوا فاكرين إنه أجنبى وفيه إختلاف بينا وبالتالي هيكون فيه مشاكل، بس لما أتقدم أقتنعوا بيه وحسوا إنه مصري من كتر ماهو أطبع بعاداتنا وتقاليدنا المصرية، عشان كده مكنش فيه صعوبات ومعارضة من الأهل لكن الصعوبات كانت في إصدار الأوراق الرسمية".

صورة من زفاف إسراء ووان يو

وأضافت إسراء قائلة :" إحنا بقالنا سنة متجوزين ومعانا بنت عندها 5 شهور، اسمها "وان لى لى"، والاسم العربى بتاعها ليلى، وهى طبعاً حاصلة على الجنسية الصينية من والدها".

تربية ليلى على الثقافتين
 

وعن تربية طفلتهما على أي ثقافة، قالت :"ناوية أربى بنتى على الثقافة الصينية والمصرية، خاصة إن والد ووالدة سعد بيتعاملوا معاها باللغة الصينية، وبيشتروا لها ملابس صينية وكذلك الأكل صيني، لكن الأمر طبعا مختلف عند أهلى اللى بيتعاملوا بالمصرى، وناوية أدخلها حضانة بتعلم اللغة الصينية بجانب العربى".

واختلاف اللغة يقف عائق بين إسراء وعائلة زوجها، حيث قالت:" اختلاف اللغة بينا مش عامل مشكلة في التفاهم لأن أنا عارفة اللغة الصينية وساعات بتعامل مع سعد بيها بجانب العربى". 

اللغة العربية سبب قصة حب سلمى وزوجها الهندى إبراهيم خان
 

واختلاف الثقافات والعادات والتقاليد لم تكن عائق في نجاح قصة حب سلمى عرفة وزوجها الهندى إبراهيم خان، حيث تحدثت الزوجة خريجة علوم البايوتكنولوجي عن قصة حبها لزوجها الهندى الذى يعمل مهندس برمجيات عن قصة حبهما، حيث قالت لـ" اليوم السابع":" أنا كنت بشتغل مترجمة و في إجازة السنة الثالثة من الكلية كنت بحضر لإمتحان أيلتس للحصول على منحة دراسية و كان فيه وقتها جروب للمنح  بيساعد اللي عايز يتعلم لغة إنجليزية وصادفني فيه بوست لأبليكيشنز من ضمنهم واحد مكنتش أعرفه و اللي برضه كان أول مرة إبراهيم يستخدمه لتعلم اللغة العربية ، و لما بدأت جالي فوق 500 ريكويست، الوحيد اللي قبلت طلبه كان إبراهيم و الحقيقة مش عارفة إزاي لغاية دلوقتي لكن قدر الله و النصيب الحمدلله ".

سلمى وإبراهيم

وتابعت :"إحنا الإثنين عمليين من خلال الوقت اللي اتعرفنا فيه على بعض قدرنا نفهم بعض وطبيعة أسرتنا وعاداتنا وتقاليدنا وطلب يتقدم لوالدى".

موقف العائلتين من الزواج
 

وعن رأى عائلة سلمى بالزواج من هندى، قالت :"والدى كان مرحب بإبراهيم لإن والدى كان سافر بلاد كثيرة و عارف الهنود، ومامتي كانت قلقانة و ده طبيعي خاصة إنى بنت و هتجوز بعيد عن أهلى و ماما متعلقة بيا جداً، وإبراهيم جه مصر وشافوه و اتكلموا معاه و حاول يطمئن مامتي و خوفها قل شوية ، وأهل إبراهيم كانوا ما شاء الله مرحبين برضه و والدته لما شافتني أول مرة فكرتني كشميرية وعملنا احتفال بسيط في مصر و و احتفال ثاني في الهند بالطريقة الإسلامية مع مولانا و رسمت حنة و الوليمة كانت أكلة برياني و الأجواء كانت بسيطة و جميلة ما شاء الله".

سلمى وزوجها الهندى

وتصور سلمى وإبراهيم مقاطع فيديو ليتحدثوا فيه عن الثقافة الهندية والمصرية والسفر وتجربتهما، لذلك يواجهان تعليقات مختلفة منها الإيجابية والسلبية، حيث قالت :"المجتمع أكيد عنده مشاكل مع أي حاجة مختلفة، اللي بيعترض على جوازنا بيكون طرف ثالث مانعرفوش لكن إحنا بنتجاهل الكومنتات دى و بنبص للناس الجميلة اللي بتدعمنا و بنعمل اللي يناسبنا لإن مش كل الناس زي بعض و كل واحد مسؤول عن نفسه و قراراته".

حياة أسرية سعيدة "مصرية هندية"
 

وعن طريقة التعامل بين إبراهيم وسلمى مع إختلاف ثقافتهما، قالت سلمى:" أنا اتربيت في الإمارات و كل المجتمع حواليا كانوا من الهند و باكستان و بنجلاديش و كنت باكل هندي و معلمة الإنجليزى كانت هندية و أول صديقة ليا كان نصها هندية ونصها يمنية فالثقافة الهندية و الهنود مش حاجة غريبة عني وكمان الثقافة الإسلامية هي الأساس لإن فيه إختلاف بين الهنود المسلمين و الديانات الثانية و الهنود المسلمين بيحبوا مصر ".

وكيفية تعامل سلمى وإبراهيم مع اختلاف ثقافتهما، قالت :"إحنا بنحاول نرضي جميع الأطراف بقدر المستطاع، فأي مناسبة هندية ببقى هندية و بلبس الساري و الأساور و في أي مناسبة مصرية إبراهيم بيبقى مصري، من حيث العادات و المتعارف عليها في العائلتين و بالنسبة للغات فإحنا بنتكلم إنجليزى و اللغة الأوردية  و العربي".

"صدفة" سبب بداية قصة حب إسراء وزوجها الكوري " كيم جونغ اين "
 

وكحال قصصنا السابقة، استطاع الحب أن يجمع بين إسراء السقا والتي تعمل مترجمة عربية ومديرة تسويق لشركة مستحضرات تجميلية في كوريا الجنوبية، وزوجها الكورى" كيم جونغ اين " والذى غير اسمه بعد إسلامه لـ" ريان" ويعمل محاسب، وتحدثت الزوجة عند بداية شرارة الحب بينهما، حيث قالت لـ" اليوم السابع":" اتقابلنا بالصدفة كنت عايشة في كوريا من قبل ما أقابل ريان ويوم ماقابلته كنت في بتمشى في منطقة جديدة عليا عشان كنت راحة مشوار، وكنت بدور على أقرب محطة مترو وموبايلي كان فاصل شحن، وشوفت ريان وسألته ممكن أعرف أقرب محطة مترو هنا فين ؟ واستغرب إني بتكلم كوري وساعدني وقالي مكانه وقالي إنه كمان رايح المترو فممكن يوريني المكان فين  وسألني انتي منين قولتله من مصر قالي الإهرامات أنا بعشق التاريخ المصري وأول مرة أشوف حد من مصر هل ممكن نكون اصدقاء؟، وفي الفترة دي كنت محتاجة حد أتبادل معاه اللغة الكوري علشان اقويها عندي ومن هنا بدأنا نبقي أصدقاء ".

حفل زفاف إسراء وكيم جونغ اين

وتابعت :" ريان كان مسلم قبل زواجنا بفترة كبيرة واعترف ليا بعد سنة من صداقنتا بحبه وطلبنى للزواج ولكن بصراحة أنا رفضت في البداية لأني ماكنتش بفكر في الإرتباط وكنت خايفة من التجربة لكن هو قالي تسمحي تكوني أم أطفالي وأنا هكون أسعد إنسان لو انتي زوجتي وأنا عارف إنك خايفة ولكن هخليكي أسعد واحدة في الدنيا  وفعلاً أثبت ليا في كل مرة إنه راجل بجد وهو الإنسان اللى هيخليني أسعد واحدة في العالم وقد كان والحمد لله  بيحاول بكل الطرق إنه يسعدنى دايماً وأنا كذلك".

إسراء وكيم

ولم تواجه قصة حب إسراء وريان أي صعوبات، حيث قالت إسراء :"ريان ماكنش عايز يتجوز أساساً لكن لما فتح مع أهله موضوع جوازه مامته مصدقتش أبداً لأنه كان بيقولها أنا مش هتجوز ابداً ويومها اتصلت بيا قالتلى يلا نروح نعمل الزواج الكوري دلوقتي حالاً من كتر ماهي مش مصدقة، وطبعاً كانت مبسوطة بجوازنا وبالنسبة لوالدتي واخويا توسموا فيه الخير وهو فعلا كان نعم الرجل وماكنش فيه اي مشكلة نهائي في زواجنا أو إتمامه حتي في الأوراق ".

4 سنوات حب وهنا
 

عمر زواج إسراء وريان 4 سنوات مليئة بالحب والسعادة، وأثمر هذا الزواج أيضاً عن جميلة وحبيبة، والتي تحدثت عنها إسراء قائلة:"ربنا اكرمنا بـ"جميلة "وليها اسم كوري وهو " دا أون " ومعناه كل شيء جيد يأتي للجميلة "و"الحبيبة" أو حبيبة وليها اسم كوري " دا مين " ومعناه كل شيء سيء يبعد عن الحبيبة".

إسراء و كيم جونغ اين

وعن طريقة تربيتهم قالت إسراء :" إحنا بنربيهم على الثقافتين المصرية والكورية حتي البيت ماشي عندنا كده يوم مصري ويوم كوري وطبعاً بجانب الدين الإسلامي

مزج الثقافتين بمنزل إسراء و" كيم جونغ اين "
 

لم يكن إختلاف الثقافات واللغات عائق بين إسراء وزوجها، وهذا ما أكدته قائلة:"قبل الزواج أنا و ريان اتفقنا إننا نحترم ثقافة بعض ونمنع أي حاجة تتعارض مع الدين الإسلامى وحتي أهل زوجي متفاهمين ده كويس جداً ويمكن أنا محظوظة إن ربنا أكرمني بأسرة متفاهمة سواء من أهلى أو أهله وعلى فكرة الثقافة المصرية والكورية قريبين جداً من بعض كتير وكمان أنا دارسة الثقافة الكورية ويمكن ده ساعدني كتير في ان مايكنش فيه أي مشاكل بسبب اختلاف الثقافة".

وتابعت :"ريان اتأثر أكتر بثقافتي المصرية وده لأني بعمل كل الاحتفالات المصرية والدينية في البيت حتي لو في يوم شغل لازم أعملها عشان ريان يعرفها وبناتي بعد كده تعرفها وطبعا الأكل المصري ريان بيعشقه وبيطلبه مني زي المحشي والكشري والفتة والمكرونة بالبشاميل والبط والسمك المشوي بيفضلهم عن الأكل الكوري".

وعن اللغة السائدة في منزل إسراء وريان، قالت :"أنا وريان بنتكلم باللغة الكورية مع بعض لكن بالنسبة للبنات لازم يتعلموا اللغتين العربي والكوري".