قصيدة "قلبي في هواكي حر" للشاعر أحمد على عُكة

ننشر قصيدة للشاعر أحمد علي عُكة  تحت عنوان "قلبي في هواكي حر"..

يا أم الهرم
وأم الغلابة ف الحواري
علقت روحي علم
ليكي ف الساري
يا ام العيون السمر
داري الجمال داري
قلبي ف هواكي حر
حبك ده إجباري

يا زهرة ف الوادي
ووردة ف الدلتا
قلبي ليكي ينادي
من حتة لحتة
أنا موجة في بحرك
ومية من نيلك
أنا حبة من رملك
وحتة من طينك

حبيبتي يا حكاية
حكاها لي جدي
هقولها لولادي
يحكوها من بعدي
حبيبتي يا راية
مرفوعة ف العالي
مهما أشوف فيكي
حبك بيحلى لي

يابلادي يا غنوة
يا شط ومرسى
يا ام العيون حلوة
مهما بغيب برسى
ف ولادك القوة
ليكي العيون حارسة

أحمد علي عُكة، شاعر عامية مصري صدر له ديوانين الأول بعنوان "شباك أم رضا" صادر عن الهيئة العامة لقصور الثقافة 2014 والثاني بعنوان "نظرة حزينة في مشهد كوميدي" صادر عن الهيئة العامة للكتاب 2018.