استشارية نفسية: مش كل شاب عنده شقة وفلوس يبقى جاهز للجواز

أكدت الدكتورة سماح عبد الفتاح، الاستشارية النفسية، أن تجهيز الشاب للزواج لا يقتصر فقط على امتلاكه شقة أو قدرته على دفع المهر والشبكة، بل يجب أن يكون مؤهلاً نفسيًا واجتماعيًا وماديًا لإدارة بيت وتحمل المسؤولية. 

وقالت خلال حلقة برنامج"الرحلة"، المذاع على قناة الناس، اليوم الأحد: "للأسف، نسبة كبيرة من الشباب اليوم يتزوجون دون أن يكونوا مستعدين نفسيًا أو اقتصاديًا.. الجواز مش مجرد خطوة نقررها لأن الظروف المادية متاحة، لازم الشاب يكون فاهم يعني إيه يكون مسؤول عن بيت وزوجة وحياة كاملة". 

وأوضحت أن الاستقلال المالي من أهم عوامل الجاهزية للزواج، قائلة:  "لو ابنك لسه ما بيعرفش يصرف على نفسه بالكامل بدون مساعدتك، يبقى مش جاهز للجواز، ولو ما عندوش مخصص طوارئ لمواجهة الأزمات المالية، برضه مش جاهز، الجواز مسؤولية مستمرة مش مجرد خطوة بنخطوها وخلاص". 

وأضافت أن التربية تلعب دورًا أساسيًا في إعداد الشاب للزواج، مشددة على ضرورة تعليمه منذ الصغر كيفية التعامل مع المرأة باحترام وتقدير، سواء من خلال تعامله مع والدته، أخواته، أو قريباته. 

واختتمت حديثها قائلة: "مش كل ذكر راجل، الرجولة قيم وأخلاق ومسؤولية. إحنا محتاجين نربي شباب قادرين على بناء بيوت مستقرة وسعيدة، مش بس شباب عايزين يتجوزوا علشان أهاليهم شايفين إن الوقت المناسب!؟".