"نوستالجيا" رجعتنا للأيام الجميلة.. حسين على الهوا وعائلة الحاج متولى وسوق العصر دراما زينت رمضان 2001.. و"حديث الصباح والمساء وسوق العصر" ملحمة درامية.. و"للعدالة وجوه كثيرة" كان له حظا من الانتشار.. فيديو

قالت الفنانة ليلى عز العرب، مقدمة برنامج "نوستالجيا" على قناة الحياة: "فى رمضان 2001 كانت الدنيا لسة متأثرة بأحداث كبيرة حصلت قبلها بشوية هى أحداث 11 سبتمبر، ورمضان ده كان مزيج من الهم والفرح، لكن المصريين خلصوا من الهم، وخلوا الفرح يطلع فى الصورة".

وعرضت ليلى عز العرب، إعلانات فودافون "بيبو فرقع جيجى، ويونيفرسال، وإعلان للبن يقدمه الفنان جميل راتب، والمصرية للأسمنت العبارة فى الشكارة، وحسين على الهوا، وعائلة الحاج متولى، وللعدالة وجوه كثيرة، وسوق العصر".

وقالت ليلى عز العرب: "بقى فى استعداد عند المصريين أن جزء أساسى من مائدة رمضان التليفزيونية فى 2001 هى إعلانات شبكات التليفون المميزة والمختلفة، وقدمت شبكة "كليك" أو فودافون إعلانات حلوة تنافس الشركات التانية".
 

وأوضحت أن "معظم الناس وقتها مكنتش تبتدى يومها إلا بكوباية شاى أو قهوة مظبوطة، وظهر النسكافية وعدلت مزاج المصريين، وإعلانات مجموعة بهجت اللى شجعت الصناعة المحلية وشراء المنتج المصرى".

ولفتت إلى أن رمضان 2001 كان موسم العائلة فى الدراما بنسبة 100%، وكل الأعمال ومهما كانت قصتها كانت مبنية على العائلة.

واوضحت أن "مسلسل عائلة الحاج متولى من أهم المسلسلات فى تاريخ الدراما المصرية مش بس فى رمضان، بطولة الفنان نور الشريف الراجل المزواج، والعمل قابله هجوم كبير من بعض الناس، وفى اللى طالب بوقف عرضه، ودا ممنعش أن الناس اتفرجت عليه من أوله لآخر حلقة بنفس التركيز والشغف".

تابعت: "لو انت اخترت 5 فنانين من ذاكرتك، براهنك على الأقل فى 3 فنانين هيكونوا شاركوا فى الملحمة الدرامية اللى اسمها "حديث الصباح والمساء" لسيناريو العبقرى محسن زايد الله يرحمه".
وأشارت ليلى عز العرب، إلى مسلسل "سوق العصر" كانت درامة بتتكلم عن نوع مختلف من العائلة وهى أسرة المغازى اللى بتتفكك وتتشرد بسبب المكايد ضدها، والناس بتضامن معاها".

وأكدت: "مسلسل "للعدالة وجوه كثيرة" واللى اتعرض فى رمضان 2001 كان له حظ من الانتشار وسط الناس، لوجود الفنان يحيى الفخرانى وشياكة الحدوتة وأنها غير معتادة فى الأعمال الدرامية، وتعاطف الناس مع جابر والظلم اللى اتعرضله، وهو من علامات رمضان 2001".

ولفتت ليلى عز العرب، إلى أن التغيير طال "برنامج "الكاميرا الخفية" وبرامج المقالبن واللى حصل لما قرر طارق نور ينتج برنامج "حسين على الهوا" واللى كان بيستضيف نجوم مصريين ويتعمل فيهم مقلب وكان عنوان الضحك فى رمضان 2001.

انطلق برنامج نوستالجيا على قناة الحياة، وهو البرنامج الذى أعادت به قناة الحياة نوستالجيا زمن الفن الجميل، والذكريات الممتعة مع أجمل لحظات مرت على حياة المصريين، خلال شهر رمضان من خلال برامج ومسلسلات وفوازير وإعلانات شهر رمضان الكريم التى ارتبطت مع الجمهور على مدار سنوات طويلة.