ليلى عز العرب: "دريم بارك" و07770777 من أشهر إعلانات رمضان 2002.. و"فارس بلا جواد" آثار الجدل قبل وأثناء وبعد عرضه.. وسميرة أحمد جسدت جدعنة الحارة المصرية فى "أميرة فى عابدين" و"إمام الدعاة" جوهرة.. فيديو

قالت الفنانة ليلى عز العرب، مقدمة برنامج "نوستالجيا" على قناة الحياة، إن "الإعلان لما بيكون الأطفال جزء منه بيعلم مع الناس، فما بالك لو الإعلان بيهم الأطفال، وموجه ليهم وبطله شخصيه بيحبوها، وده اللى حصل فى إعلان ملاهى "دريم بارك" بتاع دوبى، واللى اتذاع فى رمضان 2002، بقى تجربة مبهجة".

وأضافت ليلى عز العرب: "نفس الإعلان هو هو بقى يتذاع لسنين لتعلق الناس به، واتفقنا كمان إن عظمة الإعلان ممكن تكون فى بساطته مش فى بهرجته، والحقيقة إن رمضان 2002 كان دليل على النظرية دى بعد نزول ونجاح واحد من أبسط الإعلانات اللى انتشرت وقتها فى الشهر الكريم، وسبب انتشارها ارتباطها بالإنترنت، وهو إعلان 07770777 من ابسط وأشهر الإعلانات وقتها".

وتابعت أن "المصريين أخدوا على الإعلانات اللى باللغة العامية البسيطة بتاعتنا، وده ممنعش إنه يكون فى إعلانات باللغة العربية الفصحى حققت نجاح، الفكرة إن إزاى وإمتى تكون مختلف، ولما تكون مختلف تبقى حطيت رجلك على أول طريق النجاح".

ولفتت ليلى عز العرب، إلى إعلان "لابوار" للحلويات الشرقية، حققت المعادلة دى فى رمضان 2002.

وقالت ليلى عز العرب،: "تخيل لو فى عمل آثار الجدل قبل عرضه وأثناء عرضه وبعد عرضه وكل ما تيجى سيرته، وهو مسلسل "فارس بلا جواد" بطولة النجم محمد صبحى، وتم عرضه فى رمضان 2002".

أوضحت أن المسلسل واحد من أكثر المسلسلات مشاهدة فى تاريخ الدراما العربية والمصرية بشكل عام، والسبب حساسية موضوعه وحرفية إخراجه للنور بالشكل المميز اللى ظهر به للناس.

وأكدت أنه من الصعب الحفاظ على النجاح، لأنه يحتاج مجهود مضاعف عن المبذول فى رحلة النجاح، موضحة : "ده اللى عملته الفنانة سميرة أحمد، لما رجعت للشاشة بعد غياب 4 سنين من وقت عرض مسلسل "امرأة من زمن الحب"، رجعت بعمل جديد بتوقيع الكاتب الكبير أسامة أنور عكاشة فى رمضان 2002 وهو مسلسل "أميرة فى عابدين" اللى اتكلم عن الأصالة والجدعنة اللى لسه موجودة فى الحارة الشعبية المصرية وفى أهلها".

كما أكدت أن "الأعمال ذات الطابع الدينى دائما تأخد حظها من المتابعة والتركيز خاصة فى شهر رمضان، تخيل لو فى عمل دينى ومعروض فى رمضان ويستعرض وبشكل بسيط قصة حياة واحد من أشهر الدعاة المصريين وهو الشيخ محمد متولى الشعراوى مسلسل "إمام الدعاة" بطولة الفنان الراحل حسن يوسف وهو كان من جواهر رمضان 2002".

وأوضحت أن "موسم رمضان 2002 كان من أمتع المواسم اللى فيها عدد كبير من المسلسلات اللى كلها معمولة صح فى كل عناصرها، ومنهم العطار والسبع بنات، والأصدقاء، وقاسم أمين، وأيسن قلبى، جحا المصرى، وأعمال كتير غيرهم خلتنا محظوظين بمتابعتهم".

وقالت فى رمضان 2002 رجع برنامج "الجائزة الكبرى" تقديم الإعلامى جمال الشاعر، ليقدم واحد من أقوى مواسم البرنامج اللى ارتبط به المصريين والمعلومات والجوائز اللى بيقدمها وهو صالح لكل وقت وزمن".

ولفتت إلى أن "المغامرون الخمسة" كان الأصدقاء الجداد للطفل المصرى وهو كارتون مصرى أصلى، واللى بيساعدوا الشرطة فى حل عدد كبير من الألغاز وبقى ليهم جمهور من أعمار مختلفة".

وأكدت، رحلة رمضان 2002 من الرحلات اللى بتتمنى متخلصش، والسنة اللى كان فيها التليفزيون هو البطل والناس استنت رمضان علشان تتجمع قدام الشاشة".

انطلق برنامج نوستالجيا على قناة الحياة، وهو البرنامج الذى أعادت به قناة الحياة نوستالجيا زمن الفن الجميل، والذكريات الممتعة مع أجمل لحظات مرت على حياة المصريين، خلال شهر رمضان من خلال برامج ومسلسلات وفوازير وإعلانات شهر رمضان الكريم التى ارتبطت مع الجمهور على مدار سنوات طويلة.