ليلى عز العرب بـ"نوستالجيا": كل مناسبات المصريين مرتبطة بالأكل.. 8 مسرحيات شفناها مليون مرة ولسه بنضحك عليها.. وتكشف قصة أغنية "العيد فرحة" و"يا ليلة العيد" وتوضح طقوس العيد عند المصريين.. فيديو

قالت الفنانة ليلى عز العرب، مقدمة برنامج "نوستالجيا" على قناة الحياة، لو كنت من عشاق التليفزيون وقعدة البيت فى العيد أكيد هتكون من الناس اللى بيلاقوا متعتهم فى الأفلام الهندية اللى بتتعرض الساعة 3 العصر.

أوضحت ليلى عز العرب، أن الأفلام اللى كانوا بيتعرضوا هما 3 وبتعادوا فى كل عيد، وكلهم بطولة النجم أميتاب باتشان، وبنشوفهم بنفس الشغف والترقب والانبساط، منهم فيلم "قمر أكبر أنتونى" و"مارد" وهو تانى أعلى الأفلام إنتاجا فى 1985 بالهندى وفيلم "دون".

ولفتت إلى أن كل مناسبات المصريين مرتبطة بالأكل ودا مش دليل على النهم وان الواحد بياكل عمال على بطال، وجزء من متعتنا إننا بنربط الفرحة بالأكل.

وأوضحت أن العيد الكبير مرتبط باللحمة والفتة، وشهر رمضان فيه اليامسش والتمر وقمر الدين، وفطار أول يوم مش بيخرج عن المحشى والبط والملوخية، وكمان صينية الرقاق، أما شم النسيم هتلاقى فيه الفسيخ والبيض الملون، وفى عيد الفطر الرنجة والملوحة والفسيخ والكشرى، والكعك والبسكوت والترمس".

وقالت إنه فى أوائل الثمانينات وبالتحديد عام 1982 فكر الشاعر عبد الوهاب محمد والموسيقار جمال سلامة فى عمل أغنية جديدة متعلقة بالعيد وهى أغنية "العيد فرحة" أهلا أهلا بالعيد غناء صفاء أبو السعود سلطانة البهجة، اللى من خلالها أدائها للأغنية كانت خايفة من مقارنتها بالست أم كلثوم، خاصة أن المقارنة بين الأغنتينى هتحصل هتحصل".

أوضحت، أن المخرج شكرى أبو عميرة أقنعها أنها تاخد الخطوة وشال منها قلقها، لكن اتفقوا أنهم يصوروا الأغنية فى الشوارع مش فى الاستوديو، وتم التصوير قدام جامعة القاهرة وسط الأطفال وفى حديقة الحيوان وعلى الحناطير، وبقت الأغنية شريكة فى بهجة العيد، من الثمانينيات ولحد دلوقتى، ومين ينسى "سعدنا بيها" اللى لحد دلوقتى مش عارفينه".

وأشارت إلى أنه فى أواخر التلاتينات كانت كوكب الشرق أم كلثوم داخل الاستوديو علشان تسجل أغنية ما، فسمعت وهى على الباب واحد من الباعة الجائلين بيقول: "يا ليلة العيد أنستينا"، وهى جملة بيرميها الراجل كده متعرفش جات على باله منين، لكن الجملة علقت فى ذهن الست.

أوضحت أنه فور مقابلة الست للشاعر أحمد رامى، والملحن رياض السنباطى فى الاستوديو طلبت منهم أغنية يكون دا مطلعها "يا ليلة العيد" علشان تخرج للنور، وهى الأغنية المبهجة والمعمولة منذ أكتر من 85 سنة، وبقت أيقونة الاحتفال بليلة العيد فى مصر والوطن العربى.

وأكدت أن طقوس العيد عند المصريين فى مصر كما هى مهما مرت السنين، بنفس الجمال والتفاصيل اللى بتدى قلوبنا بهجة، ومش فارقة عيد صغير ولا كبير إحنا بنعرف نفرح فى أعيادنا كويس قوى، ومش بنسمح لحد يعكر مزاجنا فيها.
وذكرت أن البسكويت والكعك وشيل الصينية وحطها فى الفرن، وحسبة الطلوع بكام هدية من الأهل والأقارب، والتخطيط لخروجات بكره ونروح فين وخناقنا لو قعدنا فى البيت، ومين اللى هيكسب فى معركة تحويل القنوات علشان يخلى الكل يتفرج على اللى هو عاوزه، وبنفرح من قبل الفرح".

وأكدت عز العرب، أحلامنا كانت بسيطة وأقل حاجة كانت بتخلينا طايرين من الفرحة، بنتلكك عشان نفرح، واللى يؤكد ده 8 مسرحيات كانوا بيتعرضوا فى كل عيد وهم مسرحية "العيال كبرت، ريا وسكينة، وجهة نظر، عش المجانين، المتزوجون، عشان خاطر عيونك، شاهد مشفش حاجة، سك على بناتك".

ولفتت إلى أن معظم الأعمال دى عايشة لحد النهاردة، كأنها بتقولنا أنا ضد الزمن، وكل واحد عارف نهاية كل مسرحية والحوار، والكل ضحك مليون مرة على مشاهد معينة وبيضحك تانى عليها".

وتابعت، العيد هو احنا واللمة اللى بنخاف عليها من الزمن، وهو الضحكة اللى بتطلع من القلب لما بنبص حوالينا ونلاقى اللى بنحبهم لسه موجودين، موضحة أن الموسم دا من "نوستالجيا" خلانا نفتكر أيام راحت، وفكرنا أن الذكريات دى لسه عايشة جوه كل واحد فينا، ويارب يفضل العيد دايما نور فى عنينا ولمة فى بيوتنا ودفا فى قلوبنا، ولو الدنيا اتغيرت خلينا نحافظ على الحتة الحلوة دى جوه روحنا، علشان نعديها للى جاى بعدينا، وكل عيد وانتم بالخير نفسه يا أحلى ناس فى الدنيا".

انطلق برنامج نوستالجيا على قناة الحياة، وهو البرنامج الذى أعادت به قناة الحياة نوستالجيا زمن الفن الجميل، والذكريات الممتعة مع أجمل لحظات مرت على حياة المصريين، خلال شهر رمضان من خلال برامج ومسلسلات وفوازير وإعلانات شهر رمضان الكريم التى ارتبطت مع الجمهور على مدار سنوات طويلة.
البرنامج من إنتاج المتحدة للإنتاج الفنى وإخراج مصطفى عبد الفتاح وإشراف إسلام عبد الحكيم ومدير البرامج محمد عدلى وكتابة الحلقات تامر عبده أمين وإعداد زياد شاهين ومادة ارشيفية غادة الشعراوى ومراجعة تاريخية أسامة بديع ومدير فريق البحث شريف أسامة.

موسم رمضان هو فترة ذهبية فى العالم العربى للإنتاجات التلفزيونية والدرامية، حيث تشهد الشاشات إقبالاً كبيراً من الجمهور على متابعة المسلسلات والبرامج التى تُعرض خلال هذا الشهر الكريم. وعلى مدار السنوات، قدمت الدراما العربية والبرامج التلفزيونية أعمالاً لا تُنسى، تركت بصمة فى ذاكرة المشاهدين، وهو ما تستعرضه ليلى عز العرب من خلال برنامج نوستالجيا على قناة الحياة، حيث تتناول أيضا تعاون عادل إمام مع العندليب الأسمر وأيضا الدكتور مصطفى محمود وبرامجه.

شهر رمضان ليس فقط شهرًا للدراما والمسلسلات، بل هو أيضًا موسمٌ للبرامج التلفزيونية التى تحظى بمتابعة واسعة من الجمهور العربى. ومن بين هذه البرامج، هناك بعض الأسماء التى ارتبطت بشكل كبير بشهر رمضان، مثل البرامج التى قدمها شخصيات شهيرة مثل بقلظ وعمو فؤاد وغيرهما، وشهدت مواسم رمضان على مدار السنوات فوازير نيللى وشريهان واعلانات عاشت فى قلوبنا لسنوات طويلة.

برنامج "نوستالجيا" من تقديم الفنانة ليلى عز العرب، على شاشة الحياة، وهو برنامج يتناول فوازير رمضان، وعمو فؤاد راجع يا ولاد، وبكار وغيرها.