"أحمد" يدرس الطب فى روسيا ويعمل طباخ ودليفرى: نفسى أخدم بلدى

أحمد ووالدته

إيمان حيكم

الجمعة، 11 أبريل 2025 03:24 م

فى روسيا، بين أروقة كلية الطب، ووسط الكتب الثقيلة وساعات الدراسة الطويلة، يقف أحمد إبراهيم، شاب مصرى فى الخامسة والعشرين من عمره، يطارد حلمه الكبير بأن يصبح طبيبًا على طريق لم يكن يومًا مفروشًا بالورود.

أحمد إبراهيم، طالب فى السنة الخامسة بكلية الطب، يعيش حياة مزدوجة: طالب نهارًا، وعامل فى مهن بسيطة مساءً، لا تقتصر أيامه على الدراسة والتدريب العملى، بل تمتد إلى شوارع المدينة حيث يقود دراجته النارية لتوصيل الطلبات، وفي الإجازات الصيفية، يرتدي مريول الطباخ، ويعمل أحيانًا في مطابخ العائلات خلال رحلاتهم، وفي أوقات أخرى، عمل في مزرعة طماطم، دون تردد أو تذمر.

يحكي لـ"اليوم السابع" بصوت هادئ مملوء بالعزم: "قرار الجمع بين الدراسة والشغل مش سهل، بس الظروف فرضته عليا. كان عندي هدف إني أكون دكتور، وفي نفس الوقت ما أكونش عبء على أهلي. كنت حريص أتحمل مسئوليتي".

الشغل مش عيب

لا يخجل أحمد من عمله، بل يرى فيه وسيلة لدعم حلمه. ويحكي عن تفاصيل حياته اليومية: "يومي بيبدأ بدري جدًا. بحضر كل المحاضرات والدروس العملية، لأن كل معلومة بالنسبة لي زي طوبة ببني بيها مستقبلي. أول ما تخلص الكلية، بشتغل دليفري 6 ساعات. في الأول كنت محرج، بس بعدين فهمت إن مفيش شغل يعيب صاحبه طالما بيكسب منه لقمة شريفة".

في الإجازة الصيفية، يتحول المطبخ إلى مساحة أخرى يعبر فيها أحمد عن نفسه، ويحكي: "اتعلمت الطبخ من أمي، وكنت بشتغل طباخ. أوقات كنت بسافر مع عائلات أطبخ لهم، وكنت بستمتع إني أطلع أفكاري في الأكل. عمري ما سيبت وقت فاضي، حتى اشتغلت في مزرعة طماطم. بس دايمًا كنت بحاول ألاقي وقت للمذاكرة، مكنتش بسيب كتبي".

مع كل هذا، تأتي التحديات: "أصعب حاجة كانت ضيق الوقت والإرهاق، ساعات كنت بحس إني تعبان جدًا ومفيش طاقة، بس هدفي طول الوقت قدام عنيا. ولما والدي توفى ومقدرتش أنزل أحضر الجنازة، كانت لحظة صعبة جدًا عليا. بس كملت، رغم كل حاجة".

دراسة الطب ليست سهلة، والعمل إلى جانبها أصعب. فيحكي أحمد: "كنت بحاول أنام شوية ساعات قليلة، بس كنت مضطر أنظم وقتي علشان ألحق كل حاجة. الصبح دراسة، وباقي اليوم شغل، والمذاكرة بتتزاحم وسط كل ده".

أحمد: نفسي أكون جراح وأخدم بلدي

رغم المشقة، لم يتنازل أحمد عن حلمه أو ينساه: "نفسي أتخصص في الجراحة، وأرجع بلدي أشتغل فيها وأفيد الناس. طول الوقت كنت بحاول أحافظ على مستوايا، وفعلاً قدرت أحصل على تقدير امتياز، والحمد لله".