آخر وصيلْ مَاتْ بالرَّحم.. قصيدة كريم سليم بملتقى بيت الشعر العربي للنص الجديد

يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا..

بيت الشعر العربي

آخر وصيلْ مَاتْ بالرَّحم .. لـ كريم سليم

       
الليله دي ..
ليه  الفُراق له طعم أبويا وربِّنا..
وريحةِ النَّبي
وخدود حبيبتي إللي داقها الموت بِدالي
وقالّي إنُّه ماحبهاش ؟! ..
الفرْح باش ف جيوبي من كتر العشم
ومافيش مُجيب غير الدموع
مُفلسْ أوي وف صدري جوع بيوزِّني...
أبدأ أغمِّس بالبكا واشبع عياط
يارب بص ف صدري مات
عيّل منيل ف النَّصيب
عيّل أوي ..
البختْ قالْ لُه تسيب هاسيب
والحظ سارقُه ليه فِ منابه ؟!
بادىء عتابه إن قلبه مالوش عتاب
مقروص بعقربْ ساعةْ حنِّت...
للقمر وقت امّا غاب ..
من غير جَواب معقول
من غير نهار قاتل
قتيِل .. مقتول ..
الليلة ليه كل الحقايق رصّ طوب ؟!..
ويادوب يادوب
الحزن باني المصطبةْ فِ صَدري
بيصبّ فوقي ربنا الشرباتْ
أبويا ماتْ شحاتْ زغاريد في الجنازه
عابر مع العابرين ف حلمه
مِن رقبةْ إزازه
مع إنه كان شغال إله للشمس
ويَّا الليل ..
ولهدّة الحيل .. ولكل أحلام الغلابة
أبويا كان ف الهمس..
شغال ربابةَ
بتصالح أبوزيد على الغَطريف
وعبد لينا وللرغيفْ
وف إيده خط العمر كان هوَّ الوتر
شايلُه على كفة دراعهْ
مع إنه كان عايش سيزيفْ
وماكانش يوم يحلالُه كيف غير العفَرْ
عشْق الطّيران ..
السفر ..
حُبّ الفِراق ..
أبويا كان سوّاق
رابط على وسطه الفرامل والشَّقا
يرقصْ فَناه جوَّه البَّقا
تحطيبْ على تنُّوره ..
وكان عجيب الصورةْ
يشمع الفَتلةْ ..ويحزِّم التارةْ ..
يِفارق ..
يِطْرِزْ بمنقارِ الحمامْ طعم اللُّقا
فوق كل قُمَاشاتْ المَفارق
صكِّ استلامْ الصخرةْ من غيرِ أَجنحةْ
سلخِ الرَّحايا مِ الرَّحا بِطحنِ الرحيلْ
وماكانشْ غَشَمهْ ف قلبِ ضهرُه طلعلُه حيل
غيري أنا ..
رغمِ إنًّه كان ربِّ العَنا كان يِبتسم
وتملِّي دايمًا يترسمْ ..
بالأصلِ ده اللي ماغسلوش ولا كفّنه فِ ساعة سفر
ولا سدّ عنه لربنا آخر كفالةْ
ولا أغنى عنه ف الغرام..
أهيف فواتير السفالة ف الهوى بوصْل الرَّحِم
ولا مَضَّاهوش غير ميْة إِيصالُ إنَّه استلم
إنّه احتلم شهوِ العدمْ ..
شكلِ النَّدم ..
إنَّه اترجم ستين خريف الّا روحين
وانَّه اتهزمْ م النَّار
وانتصرْ ع النورْ
وشاف صوابعْ ربنا ..
وقت امَّا قرَّر ينحتُه ف ساعة صفا متعاصة طين
وانُّه التأم ويّا الألم لمّا اتقسَم نصِّين
وانَّه اتعدم بسجارةْ طايشةْ ف الرئةْ
وانَّه اترهن ف هدوم ضمينْ
يُبعَث تملي ف البُكور علشان يبوس
رِجْل الشقا ..
يحفظ تفاصيل المدنْ بنت العتيقةْ..
ينسى تفاصيل العفَن
لما يجمَّع ف الطِّباعْ .. قبل الطوابع
إزاي يلزّق ف الحقيقة ..؟
ويمدّ خدُه لعسكري لمّا يموتْ عَ التارة راكعْ مِ النَّعسْ
فتفّوقه لسعة قلم
يصحى على إيد الإله هَرْياه...
وبتشدّ الرُّخَص ..
فيطلَّع القلبِ الغشيمْ ويسلِّمُه..
ويكّمل السكة فِ تغني فِ الغنا
ف الدندة ب ليلى مراد ..
يا رايحين بالحلم لمقام النبي
اللي اتسحل وماحجّلوُش
شكل الرتوش ..
عزمُه بغرامات حِلمنا
نِملِك فُرَصْ عصافير تراود لارتعاش
رغم انَّه كان فايق أوي
لكنه مات مسطول ف كفنك يا اندهاش ..
أبويا كان ببلاش ..
وما كانش له ف الحي غير نخلةْ
ورَّثَها قبل الفُوت بعام لعيال أخوه
ومكانش لُه ف المِخلةْ غير خيّه براس تعبان
والحاوي قاله زمان حرص وماتخوّنش
حرَّص ومات مِتخان
حرَّص ومات مِتهان ..
حرَّص ومات خسران رهان عَ الدم
رغم استلاب الوهم من شِدقه
رغم ان كان جِلبابه سَيَّاع الجميع
سافر وحيد ..
سافر ربيع دبلان ..
سافر وسنَد الراس..
وسابني لوحدي أنا سهران
والليلةْ دي ..
ليه الفِراق لُه طعم أبويا وربنا.....
وريحة النبي ..
وخدود حبيبتي اللي داقها الموت بدالي
وقالي إنَّه ماحبهاش ..

كريم سليم

  كريم سليم

عضو نادي أدب قصر ثقافة الفيوم
شغل منصب رئيس نادي أدب قصر  ثقافة الفيوم دورة 2020-2022
عضو نادي الأدب المركزي دورة 2020 - 2022
الإصدارات: ديوان طقوس النفخة عن سلسلة النشر الإقليمي للهيئة العامة لقصور الثقافة "٢٠١٣"
  شارك في مؤتمر أدباء مصر دورة 2017
  فائز بمسابقة نادي أدب الفيوم في مجال شعر العامية 2016
فائز بمسابقة مراكز الشباب عن محافظة الفيوم في مجال شعر العامية 2018