دمع الغزال.. قصيدة شروق نبيل فى ملتقى بيت الشعر العربى للنص الجديد

يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا..

(دمع الغزال) لـ شروق نبيل

كانت على طرْف البُكا
و عنيها مش صابرة
حابسة دموعها في جفنها
بمنتهى الخِبرَة
جواها ضعف.. يا قوّتُه!
واقفة بصلابة كأنها
جيش النبي في غزوته
و انا كنت مَحْني في ضِلّها
للعابرين عِبرَة
راجع من الماضي البعيد
من ذكريات غَابرَة
بنفُضْ تراب البُعد من كَفّي
و بمِد ليها خطوتي.. مَكْفِي
ماسك في ايدي.. قلبي وردَايـَة
لبنت كانت جنة وغواية

انا شوفت دمي فـِ خدها حُمرَة
أم العيون المُرعِبة السمرا
دمعي في كاسها بتشربُه خَمرَة
و الروح غزالة
في صِدرها القضبان

كانت جريحة و مُجهدَة و خايفة
مَرْعُوشَة زي الشـَّك مش شايفة
و انا كنت لسه في اول الدنيا
يدوب
بتهجَّي فلسفة النخيل
لو يحدفوه بالطوب
و ازاي بتسقَط دمعتُه
والخَلق ياكلوها
انا كنت لسه من هروب لهروب
بنجّي قلبي من هوى معطوب
ولمحتها في خِدْرَها بتّوب
متكلفتة من بردَها بالتوب
كانت خليلة وكنت ليها خليل
كان شعرها اغمق
من الوِحدَة بـ ليل
و جسمها البان النحيل
مليان ندوب
كان كل لما يسيبها حب
ينْبِت مكانه في جلدها
شوكة
كانت بتبكي
لما عَدِّيت جنبها
غرقِت عنيا في دمعها
ضَحَّكْتها
بان بؤها فلوكة

فاتت سنين.. وفوْتّها
و رجعت ليها.. خُوْفـْتها
معرفش بس جرى لها ايه..!
من بعد كل الضعف دا
صبحِت كما صقر فـِ فضا
واقفة هناك مِستأسِدَة
ازاي بتستقوَى كده..!

شروق نبيل

شروق نبيل

الإصدارات: ديوان لايق عليك الحزن
الجوائز: جائزة أخبار الأدب عن ديوان شعر العامية