استشارية أسرية: "راعى جبر خاطر زوجتك.. ورصيد الود بيتحوش فى لحظات الضعف"

قالت سماح عبد الفتاح، الاستشارية فى العلاقات الأسرية، إن من أهم مفاتيح نجاح العلاقة بين الزوجين هو مراعاة لحظات الضعف، خاصة لما تكون الزوجة فى حالة استثنائية زى الحيض أو النفاس أو الحمل أو المرض.

وأضافت الاستشارية فى العلاقات الأسرية، خلال حلقة برنامج "الرحلة"، المذاع على قناة الناس، اليوم الخميس: "راعى مشاعرها وخليك جنبها.. وجبر الخاطر مش رفاهية، دى ضرورة لبناء رصيد الود اللى بيتخزن فى القلوب وقت الشدة".

وأشارت إلى أهمية عدم المقارنة، قائلة: "ما تقارنيش بين جوزك وبين حد تانى، لا فى الرزق ولا فى الطباع، وانت كمان لا تقارن مراتك بحد لا فى الشكل ولا فى المهارات.. المقارنات دى بتخصم من رصيد المحبة".

وشددت على أن التوجيه بين الزوجين أمر صحى، لكنه لازم يتم بـ"أقصى درجات اللطف والود، من غير تجريح أو كلمات جارحة"، مضيفة: "التعديل مطلوب، والتفاهم مطلوب، لكن الغضب مش رخصة لقول أو فعل أى حاجة.. لو مضايقك حاجة اتكلم فيها من بدرى، الضغط بيولد الانفجار".

وأكدت أن "الرضا والطموح ما هماش ضد بعض، ينفع تبقى راضية وسعيدة باللى عندك، وفى نفس الوقت تطمحى وتخططى لمستقبل أفضل، طول ما الزوجين بيخططوا لبكرة سوا، دى علامة أمان واطمئنان".

وقالت: "الخروج، الضحك، الكلام، الحكايات.. دى حاجات بتغذى العلاقة، لازم تخصصوا لها وقت بعيد عن الروتين والعلاقة الخاصة.. دى روح الحياة الزوجية".

وأضافت: "ما تنسوش معنى 'انصر أخاك ظالمًا أو مظلومًا' فى الجواز.. يعنى ما تفضحوش بعض قدام الناس، لكن واجهوا بعض بالخطأ بود واحترام، ودايمًا كونوا سند لبعض مش عبء على بعض".

أكدت الاستشارية الأسرية سماح عبد الفتاح أن الزواج كما شرعه الله عز وجل هو لقاء بين اثنين من البشر، يحمل كل منهما صفات مختلفة، بين الحسن والسيئ، الآمال والخيبات، القوة والضعف، فى إطار بشرى طبيعى، بعيدًا عن المثالية المبالغ فيها.

وقالت الاستشارية فى العلاقات الأسرية، أن "أكبر تحدى بيواجه أى زوجين هو السعى للمثالية وتوقعها من الطرف التانى، لأن ده بيحول العلاقة لساحة محاسبة مش حياة، وده بيفقد العلاقة معناها الحقيقي"، مشددة على أهمية "التعامل بوعى وأخذ بالأسباب لتحقيق حياة أفضل، مش لصعوبة الحياة أو الضغط على شريك الحياة بمتطلبات وتوقعات غير واقعية".

وشبهت الزواج بـ"لغة ليها حروفها وأبجديتها، ولازم نتعلم حروفها الأول قبل ما نكون جمل مفهومة تعيش وتستمر"، مشيرة إلى أن كل سلوك أو موقف فى العلاقة هو حرف من حروف أبجدية الزواج، "لو عرفنا نتعامل معاه صح هنقدر نكون حياة مليانة مودة وسكينة".

وأوضحت أن من أهم مفردات هذه الأبجدية هو "الاحترام المتبادل والتقدير الحقيقى، والاهتمام بالمشاعر وعدم تسفيهها، الحب عند الستات بيتجلى فى الحوار، لما تلاقيها بتحب الكلام معاك، اعرف إنها بتحبك ومبسوطة".

وأضافت: "أسرار البيت تخص الزوجين فقط، وخصوصية العلاقة الزوجية لازم تكون خط أحمر، محدش ليه يدخل فيها أو يعرف عنها حاجة، حتى أوضة النوم ليها حرمة ومكانة خاصة لازم نحافظ عليها".

وشددت الاستشارية الأسرية على أهمية التفاصيل الصغيرة فى تعزيز العلاقة، مثل "استقبال الشريك بترحاب، المشاركة فى الوجبات، تنظيم مواعيد النوم، والمساعدة فى الأعمال المنزلية، حتى لو كان الزوج مرهق"، مشيرة إلى أن "عرض المساعدة لوحده كفاية يوصل المودة، وغالبًا الزوجة هترفض من باب التقدير بس هتحس بالحب والدعم".

وقالت سماح عبد الفتاح: "التجمل والتزيّن للطرف الآخر مش رفاهية، ده حق من حقوق العلاقة.. زينا لبعض زينة للقلوب مش بس للأجساد، وابتسامتك دايمًا مفتاح السعادة، سواء كنت زوج أو زوجة".