كلاب تشيرنوبل.. قصيدة ممدوح عبد الحميد بملتقى بيت الشعر العربى للنص الجديد

يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، ويقوم "اليوم السابع" بنشر قصائد الشعراء تباعًا..

بيت الشعر العربي

كلاب تشيرنوبل .. لـ ممدوح عبد الحميد

قتلتي كام وردة؟
حرقتي كام صورة كانوا ينفعوا ذكرى؟
ضليتي كام واحد بيسألك ع الطريق؟
بابا؟
أهلا
مش غريب غربة كهذي اللي في ضلوعي تعشمك بالغرق
شدني.. شد!
أنا في اتجاه الشط ببعد بابتعد
واتوهم كف الغريب
واتوهم وأفرح بقرب مخادع لكن يصح
وساعتها مين ينفعني لما انجرح؟

رتبتي ليه المكتبة؟ مش قلتلك لأ
ضيعتي كل الورق
مفيش حاجات بتحصل تعوض اللي اتسرق

باين من على بعد؟
باين عليا البعد؟
الكحل سايح من على عينيكي القمر
ويا بخت من ضيع طريقه في سكتك
طفيت سجايري لعل صدر الكون يخف ويبطل قلق

مالَك؟
مش كنت خليتلك قاروصة كده
تنفع في ليلة عيد
وخفيف خفيف
بتكح ليه وبتترعش
وبتطفي نور الشوارع
رغم إن نظرك ضعيف
خايف من الموت زي عادتك؟
رُدِّي عليه
قوليله إزاي ينتشر زي الوبا في الجسم
قوليله إزاي يخون اسمه
مش هو هو الاسم؟

ماعرفش ليه جمعتكم
من غير ما أكون محتاجلكم
لكن أنا
أنا والصالون والكلب
وجواكت سعادتك اللي ماليين الدولاب
زي خيالات المآتة
وجلاليبك يا هانم اللي كنت واعده نفسك تلبسيهم
لو صادف العيد شتا
وذكريات وقّعتها منكم
خدِتها الحيطان
وعلَقِتهم عالساعة زي الدقايق
وصور لبنات فوق السفرة ماحدش حاطت فيهم ورد
وفازات على أطراف الكراسي
وخناقات ومسرحيات الخميس
ومآسي
مآسي كتير
بتسِح دمعتها على طقم لأكياس المخدات

وهكذا
حاجات غيّرتهم
وتلاشت من دماغي حاجات
وأهو
بسمع فرانك سيناترا وبحب أحمد ذكي زيك بالظبط
بسمع فايزة وبحب رشدي أباظة زيك تمام
حد ياريت
يقفل صوت المزيكا التانية من الراديو
ويجيبلي معاه  رقبة الكلب اللي بينبح ده
وياريت يقطع عرق ويبكي معايا على الوحدة

على غير العادة
شكلي اتعودت على فراقكم
وبجمع أشلائكم في النور الخافت ده
علشان بقى عندي هواية إني أجمعكم
بالليل.. الواحد بيقلب راسه يمين وشمال
وأتاري
أمل الدنيا السهاري
عاضض طرف الملايا ودمعته فارشة السجاد
أرجوكم اخرجوا بهدوء مش زي المعتاد

الفجر هيدّن دلوقت وهيفكرني بخناقاتنا
الصلاة والصوم والعبادات
ووجود ربنا في حياتنا
وهدومي
وبنت الناس اللي أذيتها
والبنت اللي أنا فكرت إن أنا حبيتها
وخبطة رجلك عالسلّم
هيأدن وأنا هتوجع زي الممسوس
في علاقة اتقصت بيني وبينكم بمقص
وخيط مقصوص بيحاول يملا مكانها
وخيالي يلف البكرة حوالين رقبتي
أرجوكي لو مش علشاني.. علشانه
أرجوك لو مش علشاني علشانها
أنا دلوقت في مرحلة الخطر
خدوا بعضكوا واندمجوا في أي خيال
أوعدكم هقابلكم لما الدنيا تبدل مطر

أرجوكم أرجوكم
أنا والكلاب بعد الطوفان
ننبح لبعض ومانداريش عاطفة
ومانطاردش أبدا طفل على عجلة
ومانطاردش أبدا نومة حنين خاطفة
الصمت ده
مش ده اللي معناه الرضا
الصمت ده هو اللي قبل العاصفة

ممدوح عبد الحميد

ممدوح عبد الحميد

صدر له صف واحد موازي للوجع 2014 دار منشورات الربيع، دليل النهايات 2018 دار منشورات الربيع، كلاب تشيرنوبل 2025 دار تشكيل.

حصل على جائزة أحمد فؤاد نجم.