قايضنى يا عمران.. قصيدة للشاعر ماهر مهران

ننشر قصيدة جديدة للشاعر ماهر مهران بعنوان "قايضني يا عمران".

خد مني كل عيشتي واديني رضاك 

رضاك دا هايعشني
وهايرد في الروح
وهايطلع من جتتي رطوبة الأحزان..
أرجوك يا عمران
خد أرضي وهي بتدوب ف المية
خد بيتي اللي الكروان معشش فوقيه
خد قعدتي ع الترعة..
وعشقي لزهر السنطة
ودهشتي بالنيل وهو ب يغزغز في ضهر الجبل
خد قمحي وهو فيه سخونة الدراسة..
خد مني الفراسة
ولبن البقرة اللذيذ
وخد كل مالي
وعيشني يا ابن الهرمة..
ضارب الدنيا صرمة
وسايبها ع الكريم..
زيك راضي واتكالي..
عيشني بقلب أبيض سليم
وعلمني أتسامح
مع اللي سرقوا الفلوس من قلب الدولاب
علمني أشوف الناس كلهم أحباب
علمني أبقى زيك
ما أقولش لحد لاه
واللي ف جيبي لغيري..
علمني ابتسم لما ينقد عيني طيري..
علمني أكون زيك طورية للي بيعزق
شرشرة للي بيحصد
دراع للي بيحش
مكنة فلوس للي عايز يقبض
سبوع للمولود
لحاد للميت
مرق وفطير للي عايش هربان
من ديون الدكان..
قايضني ياعمران..
ومش مشكلة
خلي مانجاية مرتك
وخلي بطاقتك وورقك
وخلي البيت
وخلي الحمار اللي لما بيشتاق لك
بيجيلك المدرسة
وبسببه المتابعة
خصمت لك يومين
خلي المنطلون أبو جيبين مخرومين
وقميص شعبان عبدالرحيم اللي كان بيغيظني..
لو سمحت قايضني
وإن جيت ع العيال
أنا عارف إن ربنا ماعطكش واد يشيل اسمك زي بقية العباد
وعارف ان قرايبك مستنظرين ورثك
وعارف إنك كنت
فتى سيما وحكاية..
وكان نفسك تفرح قلب مرتك منجاية..
ولما ربك ما أردش
قولت لها أنا ولدك
قلبك وعينك وكبدك
ونزلت ف الحياه قرش
خدتها لعب وهرش؛
تروح النيل وتسقيها
وتكون لها ف السقعة
لحاف يدفيها
تحفظ أغاني إليسا
وعشانها تغنيها
وتقلد لهاالعيال؛
الولد مش البنات
وأول الليل ف حضنها تبات
وف الفجر
زي الطير تفرد الجناحات
وترجع بخير البلد ليها
ف تقولك حبك مغرقني..
وضلك معيشني في أمان..
لو سمحت ياعمران
خد كل اللي عليه
عاش الخلق حاسدني
وبساعة رضا منك
ساعة واحدة بس..
أرجوك تقايضني
لو سمحت يا عمران